Gadis entregará de maneira gratuíta, este sábado 15 de outubro, 12.000 exemplares dun libro de microrrelatos sobre os soños en todos os seus puntos de venda da Galiza e Castela e León.
Esta edición de peto recompila os 100 microrrelatos finalistas da terceira edición do certame literario que a compañía de alimentación organiza.
“Animar persoas anónimas a escribir e descubrir novos talentos literarios” son algúns dos obxectivos que busca Supermercados Gadis coa convocatoria deste concurso e editando o libro para a súa distribución.
A compañía confía en que os clientes “gocen do pracer da lectura coas pequenas grandes historias que se recolleron na publicación: os desexos persoais, os propósitos que se marcan cada aninovo, os anhelos ou as reflexións máis profundas sobre o que é a realidade e os soños que quedan por cumprir”.
Aliás, Gadis dispuxo unha edición dixital desta recompilación, xa dispoñíbel na web da cadea de supermercados. Ademais de textos galegos e do conxunto do Estado español, nesta edición participaron autores e autoras internacionais de país que van “desde Perú até Países Baixos”.
Apoio á industria editorial
Esta iniciativa, incluída no programa de Responsabilidade Social Corporativa da compañía, supón tamén un “apoio” á industria editorial.
Nas tres edicións do certame literario editáronse, en total, 32.000 exemplares con pezas de temática variada. A estas cifras hai que sumar os 360.000 libros que Supermercados Gadis editou con motivo do Día das Letras Galegas en diferentes anos para achegar a literatura ao conxunto da sociedade.