O Festival Convergências alimenta a unidade entre Portugal e a Galiza

O 23 de febreiro conmemórase o aniversario do pasamento de Rosalía de Castro, mais tamén o do nacemento de José Afonso. Esa coincidencia é tomada polo festival Convergências como motor que achegue as dúas beiras do Miño, separadas por unha fronteira mais unidas por multitude de elementos culturais, linguísticos, históricos e xeográficos. O que comezou sendo un encontro de música e poesía entre a Galiza e Portugal, acabou convertido nun Festival Cultural con propostas artísticas diversas que abranguen desde a música ao teatro e da danza ao cinema, sen deixar de lado a literatura. Promovido polo grupo Canto D’Aquí e o Centro de Estudos Galegos da Universidade do Minho co apoio doutras institucións como a Fundación Rosalía de Castro, o obxectivo deste festival é dar cumprimento á Lei Valentín Paz-Andrade para o aproveitamento da lingua portuguesa e vínculos coa lusofonía. A 11ª edición de Convergências -reforzada este ano pola elección de Braga como Capital Portuguesa da Cultura- comezou onte en Santiago de Compostela cunha palestra sobre Fado en Portugal, de Artur Caldeira, quen, a seguir, deu un concerto xunto con Isabel Rei Sanmartín. Simultaneamente, en Braga, comezaba un Ciclo de Cinema Galego cunha sesión de curtametraxes. Trátase dun ciclo que fala do período posterior á ditadura até a actualidade e que continuará coa proxección de dúas longametraxes. A primeira -Sempre Xonxa, de Chano Piñeiro- versará sobre a Galiza da posditadura, que logo se comparará coa seguinte sesión, onde se proxectará a película portuguesa Terra de Abril, de Philippe Costantini e Anna Glogowski, que retrata a mesma época, pero en Portugal. Braga, Capital da Cultura: estes son os actos que non podes perder en 2025 Homenaxe ao Zeca Afonso e a Rosalía Sen dúbida, un dos pratos fortes deste encontro terá lugar no Theatro Circo de Braga o 23 de febreiro, cun grande espectáculo que homenaxeará José Afonso e Rosalía de Castro, que operan como inspiración para o encontro entre Portugal e a Galiza.O espectáculo contará coa participación de Amancio Prada e Uxía. Ademais, a ocasión serve como pretexto para que o Grupo Canto D'Aqui -organizador do evento e unha das formacións de referencia na música tradicional portuguesa- presente un CD e un libro sobre o 40º aniversario do grupo. "Este momento condensa todo o traballo destes 40 anos, conta a historia do grupo e conseguimos gravar con Uxía, unha señora da música galega, e Amancio Prada, que é o máximo impulsor da obra de Rosalía”, declarou á prensa Jaime Torres, de Canto D’Aqui. O concerto de homenaxe ao Zeca Afonso e a Rosalía terá unha segunda edición no Teatro Principal da Estrada desta vez con Iria Estévez como invitada do grupo Cantos D'Aqui. Uxía, ademais, presentará un espectáculo especial, no Espaço Vita de Braga, xunto ao cantante de fado portugués Ricardo Ribeiro, unha das voces máis rechamantes da nova xeración de cantantes de fado e un artista inquedo, sempre cheo de novos proxectos. Uxía e Ribeiro celebrarán o fado como xénero universal, explorando as profundas conexións entre este e a tradición musical galega. Outra colaboración transfronteiriza será a que terá lugar este sábado 8 de febreiro, no mesmo Espaço Vita de Braga: un concerto de "Fusão Tradicional" no que se xuntan a Banda de Música Municipal da Estrada con Canto D'Aqui. Este grupo e Rusga de São Vicente, por ourto lado, serán os encargados de fechar o festival, o día 15 de marzo, cun concerto no Auditorio Reveriano Soutullo de Ponteareas. Poesía, teatro, danza Despois do concerto de apertura de onte en Compostela, Isabel Rei Sanmartín seguirá presente en Convergências. O día 14, pronunciando unha palestra, na Casa do Conhecimento da Universidade do Minho sobre A evolução da guitarra na Galiza e ligações com Portugal; ése mesmo día repetirá o concerto con Artur Caldeira no Salão Nobre do Edifício dos Congregados; e ao día seguinte, presentará na Biblioteca Lúcio Craveiro da Silva o seu libro Galizan Nation. E o día 18, máis literatura co recital de poesía galega que darán no Museu Nogueira da Silva de Braga Silvia Penas, Silvia Mota Lopes e Fernando Pena, en colaboración coa Rede de Galilusofonía. Convergências achega tamén dúas obras de teatro: a Companhia de Teatro de Balugas representará a obra A furgoneta, de Cándido Sobreiro,o 15 de febreiro. E a Escola Municipal de Artes Escénicas da Estrada levará ao palco a obra de Chekhov Sobre o dano causado polo tabaco o 14 de marzo. Ambas funcións se desenvolverán na Junta de Freguesía de Nogueiró. A fronteira invisíbel: Galiza e Portugal seguen tendo dificultades para crear un espazo cultural común O espectáculo Danças e Cantares da Raia será o encargado de dar conta das semellanzas entre as danzas tradicionais da Galiza e de Portugal. O Grupo de Baile e Música Tradicional O Muiño de Oliveira, Ponteareas, e Rusga de São Vicente serán os encargados de mostrar ao público as características dos bailes populares de ambas beiras do Miño.