Dolores Cortés regresará á Mostra do Encaixe de Camariñas como unha das grandes referencias da moda de baño
A deseñadora valenciana comezou a súa traxectoria no mundo das pasarelas no ano 1999, debutando na súa cidade natal.
Unha das referencias da moda do baño no Estado español, e con proxección internacional, estará un ano máis na Mostra do Encaixe de Camariñas: a valenciana Dolores Cortés é unha das últimas confirmacións do desfile de Grandes Deseñadores da XXXV Mostra do Encaixe de Camariñas Deputación da Coruña.
Dolores Cortés, a segunda xeración dunha familia artesá, iniciou a súa andaina na empresa cun espírito inconformista creativo que aínda hoxe perdura. Foi pioneira no Estado español en introducir a patronaxe informatizada e o corte automático para a fabricación de traxes de baño.
Abriuse a novos mercados e, desde principios dos 80, a empresa comeza a exportar a diversos países. Moderna e competitiva, Dolores Cortés Swimwear aborda o terceiro gran reto: lograr que o concepto de moda se asocie aos produtos de baño, e desfilar nas principais pasarelas.
Dolores Cortés inicia a súa traxectoria no mundo das pasarelas no ano 1999 na Pasarela do Carmen de València. Posteriormente debuta na Pasarela Gaudí de Barcelona coa súa colección de baño para o verán de 2002.
En 2007 inicia a súa participación na Pasarela Cibeles de Madrid e desde 2008 tamén participa na pasarela Gran Canaria Moda Cálida. En 2010 é invitada a participar na máis importante pasarela americana de Moda Baño, a Mercedes Benz Fashion Week Swim xunto ao Fashion Show iniciando así a apertura ao mercado americano.
Este mesmo ano a firma Dolores Cortés é seleccionada para a realización dos traxes de baño do equipo estatal de Natación Sincronizada para os Mundiais de Shangai.
Na actualidade, Dolores Font Cortés é presidenta da Asociación de Deseñadores de Moda da Comunidade Valenciana (Dimova). No ano 2012 traballou xunto ao equipo estatal de Natación Sincronizada, para os Xogos Olímpicos de Londres, deseñando integramente algúns dos traxes de baño e fabricando a totalidade. Este equipo gañou dúas medallas, unha de prata e outra de bronce, sendo especialmente aplaudido o modelo de escamas prateadas, deseñado e confeccionado integramente pola deseñadora valenciana.
