O cesteiro Álvaro M. Leiro vén de recibir o Premio Nacional de Artesanía 2023, mentres que o taller de tecido Inés Rir&Co (Allariz), de Inés Rodríguez, gañou o galardón na categoría de Produto, e a Fundación Artesanía da Galiza obtivo o recoñecemento na categoría Promoción para Entidades Públicas polo 'Corazón da Artesanía. Encontro da Artesanía Tradicional e Popular da Galiza'. Ademais, a cesteira Julia de la Cal (O Porriño), foi finalista na categoría de Emprendemento. É a primeira vez que o sector artesán galego resulta gañador en tres das cinco categorías destes galardóns e a terceira vez que un profesional de Artesanía da Galiza obtén o Premio Nacional, un galardón que recibiron o taller de Gaitas Seivane no ano 2012 e Elena Ferro no 2019.
Tal e como recolle o fallo, a obra de Cesteiro "baséase na súa profunda conexión coa cultura da Galiza". "A súa intencionalidade é preservar e revitalizar antigas formas de artesanía, transmitindo a súa beleza e valor a través de pezas contemporáneas", engadiu. Os Premios Nacionais de Artesanía 2023 son recoñecementos que distinguen a actores relevantes da artesanía nacional que co seu traballo fan do sector un motor de economía, emprego e innovación e que outorgan un valor engadido ao prestixio do Estado español.
As persoas e entidades recoñecidas recibiron os seus galardóns de mans da secretaria de estado de industria, Rebeca Torró Soler; da directora xeral de industria e peme, María José Muñoz Martínez; do director xeral da Fundación EOI, Juan Ignacio Díaz Bidart, de Mónica Bando Munugarren, secretaria xeral da Fundación EOI, e de Carmen Ruiz Pérez, directora financeira de EOI.
O ministro de Industria e Turismo, Jordi Hereu, trasladou nun videocomunicado o seu apoio "a un sector recoñecido mundialmente e que incrementou os seus niveis de competitividade, coa innovación, os Tics e coa maior orientación dos seus procesos cara á súa comercialización". Os galardóns divídense en cinco modalidades: Premio Nacional, Premio Produto, Premio ao Emprendemento, Premio Promociona para Entidades Privadas e Premio Promociona para Entidades Públicas.
Galardóns galegos
O cesteiro Álvaro Leiro, natural de Pazos de Borbén, resultou gañador do Premio Nacional de Artesanía 2023. Previamente xa fora recoñecido co Premio Mestre Artesán Círculo Fortuny ao Mellor artesán de vangarda 2023. O seu traballo comeza coa investigación da artesanía tradicional vinculada á cestaría en espiral, unha técnica empregada tradicionalmente para fabricar cestos e recipientes para transportar auga e alimentos.
Desde o ano 2016 colabora coa firma Loewe, coa que entrou en contacto durante a celebración do Corazón da Artesanía de Agolada e desde ese momento os seus deseños forman parte do catálogo de bolsos desta marca. En 2022, Loewe presentou no Salón do Moble de Milán un bolso inspirado nas corozas tradicionais galegas, unha das pezas máis antigas da vestimenta galega que se empregaba para protexerse da choiva e do frío. Leiro participou tamén na colección de Loewe presentada no Salón do Moble de Milán 2023 a través da elaboración de bolsos e cestas elaborados con coiro.
Pola súa parte, o taller Inés Rir&Co (Allariz) recibiu o Premio Produto pola súa manta de bebé 'D-Leite', elaborada con fibra de proteína láctea. Trátase dun taller dedicado á elaboración artesanal de tecidos en tear, nos que busca sempre a incorporación de novos materiais, formas e texturas.
En 2021, esta manta 'D-Leite' xa resultou gañadora do I Certame de Materiais Innovadores da Galiza, convocado pola Xunta, na categoría Artesanal e participa nas exposicións Galiza Futura e no proxecto transfronteirizo Circular Labs, impulsado pola Escola de Organización Industrial (EOI), e foi seleccionado como exemplo de boas prácticas, sustentables e saudables como produto no concurso New European Bauhaus. 'D-leite' está tecida con fibra de proteína láctea, un material absorbente, antibacteriano, hipoalerxénico e biodegradable, que favorece a creación dun vínculo sensorial entre a nai e o bebé.
Así mesmo, a Fundación Artesanía da Galiza recibiu o Premio Promociona para Entidades Públicas, en recoñecemento ao evento 'Corazón da Artesanía. Encontro da Artesanía Tradicional e Popular da Galiza', que se celebra no conxunto histórico-artístico dos Pendellos de Agolada, desde o ano 2012. Con este é o terceiro galardón nacional recibido pola Fundación Artesanía da Galiza en recoñecemento ao seu traballo de impulso e promoción do sector artesán galego, xa que resultou gañadora desta mesma categoría nos anos 2012 e 2016, polo proxecto 'Enredadas', de diversificación do oficio tradicional das redeiras galegas, impulsado desde o ano 2012 en colaboración coa Consellería do Mar.
