Ataque Escampe vén de publicar esta quinta feira nas principais plataformas de streaming o EP A alma, que contará tamén cunha edición limitada en vinilo de dez polgadas dispoñíbel nas próximas semanas. Con este traballo, gravado entre maio e outubro de 2019 no Laboratorio Soyuz e producido por Hevi (Malandrómeda, Fluzo), a banda parte do pop para achegarse a xéneros como o krautrock, o ambient, o R&B ou mesmo o rock de estadio.
A alma supón o primeiro traballo discográfico da nova formación de Ataque Escampe, na que continúan Miguel Mosqueira, Samuel Solleiro e Lois G. Carlín e á que veñen de incorporarse o cantante Alex Charlón (quen xa fora membro da banda dende os seus inicios ata o LP O disco vermello), o batería Cibrán Tenreiro (tamén membro de Esposa, Monstruo ou Zara) e Julio Vilariño (quen producira o LP Primeiros bicos) aos sintetizadores. No EP colaboran ademais María Villamarín (Esposa), que canta en “As Cruces”, e o actor e dobrador Miguel Pernas, que presta a súa voz ás pezas de introdución e peche do disco, “Tema d’A alma” e “Reparto d’A alma”.
“O que pode un corpo”
Xa está dispoñíbel tamén o primeiro videoclip extraído do EP. “O que pode un corpo” foi realizado por David Silva, responsábel tamén do deseño gráfico e o traballo fotográfico d e ‘A alma’ e de varios dos vídeos musicais previos de Ataque Escampe.
As cancións de A alma sonarán por primeira vez en directo o 28 de decembro, no IV Guateque de inverno da Gentalha do Pichel (Compostela)
