Restrinxido o consumo de auga en Cariño por elevado contido de trihalometanos

O Concello de Cariño (Ortegal) volveu facer efectivas as restricións de auga en varias parroquias despois de detectar valores de trihalometanos por riba do permitido na billa da estación de servizo da gasolineira, procedente da depuradora do Castro. Nun comunicado, o Goberno local indicou que as analíticas efectuadas a semana pasada ofrecen un resultado adverso, polo que se volveu restrinxir o consumo nas parroquias de Pedra e de Cariño. En concreto, a norma estabeleceuse a pasada quinta feira e confirmouse cos resultados desta segunda feira. Na terza feira retomarase o servizo de camión cisterna que achegará auga ás vivendas cada terza e quinta feira no mercado municipal até que a auga volva ser apta para o consumo. Na mesma liña, tanto o sábado pasado coma onte repartíronse garrafas de auga.