María Vázquez, Álvaro Gago, Xoel López, Janet Novás e 'O soño da sultana', nomeados galegos aos Goya

A 38º edición dos Premios Goya deixa varios nomeados galegos, entre os que destaca María Vázquez, que optará a mellor actriz polo seu papel en Matria, unha película pola que o cineasta Álvaro Gago competirá en Mellor Dirección Novel. Pola súa parte, Janet Novás concorrerá a mellor actriz revelación por O corno. Chama a atención que esta sexa o único nomeamento da cinta de Jaione Camborda despois de gañar a Cuncha de Ouro no Festival de Donostia. Así mesmo, o músico coruñés Xoel López pode ser galardoado na categoría de mellor canción polo seu tema Eco, da película Amigos até a morte. Ademais, a cinta O soño da sultana, coprodución con participación da galega Abano Producións, atópase na categoría de Mellor Película de Animación.