Persoal científico do Instituto Español de Oceanografía (IEO, CSIC) realizou un estudo multidisciplinar dos rorcuais comúns (Balaenoptera physalus) que anualmente visitan as augas galegas durante a época estival.
A campaña RorquGAL B&B 2025 (Rorquals from Galicia - Blow and Biometrics), a terceira desta serie, realizouse na plataforma continental fronte ás rías Baixas entre finais de agosto e principios de setembro a bordo do catamarán Chocolate de Charter Terranova.
O obxectivo principal da campaña foi a obtención de información relativa ás poboacións de rorcuais comúns que visitan augas galegas en época estival. A pesar das malas condicións meteorolóxicas que predominaron durante estas últimas semanas, conseguíronse facer oito saídas offshore (fóra das rías) até o límite da plataforma continental. Nas mencionadas saídas púidose rexistrar a presenza de 63 rorcuais, dos cales 35 foron foto-identificados mediante imaxes aéreas para comparar cos catálogos existentes noutras rexións, tamén se obtiveron mostras de microbioma expirado de 14 individuos mediante o uso de drones. Igualmente, recolléronse mostras de tecido e de auga para caracterizar xenética e isotopicamente a estas poboacións.
"As condicións oceanográficas predominantes situaron os grandes afloramentos de microalgas e a presenza de kril en latitudes máis setentrionais e en lugares máis afastados que en ocasións anteriores (sobre o noiro continental), polo que a presenza de rorcuais non se puido apreciar tan perto da costa como en anos previos. A pesar diso, e á dificultade sobrevinda polas condicións meteorolóxicas dominadas pola presenza de temporais outonais temperáns, o número de baleas rexistrado seguiu sendo moi elevado", sinala Camilo Saavedra, investigador do Centro Oceanográfico de Vigo do IEO e responsable da campaña.
"A análise do ADN ambiental presente na auga e o uso de drones para a toma de datos biométricos e mostras do microbioma respiratorio fai posíbel obter unha información até o de agora descoñecida, o que nos permitirá caracterizar a poboación que visita as augas galegas, estudar a súa conectividade e patróns de migración, así como o seu estado de saúde", sinala Paula Suárez, investigadora do Centro Oceanográfico de Vigo responsábel dos estudos xenéticos de cetáceos que o IEO realiza no marco das Estratexias Mariñas españolas.
