Traballas como autónomo? Esta liña de axudas pode interesarche
Até 8.700 persoas que traballan por conta propia poderán beneficiarse destas bonificacións.
A Xunta da Galiza abriu o prazo esta cuarta feira para solicitar as axudas á actividade das persoas autónomas, a través dunha orde única dotada de 40,7 millóns de euros, así como os apoios á contratación indefinida por 1,3 millóns de euros.
Así o trasladou a Consellaría de Emprego, Comercio e Emigración nun comunicado, no que lembrou que, coa orde única, está previsto beneficiar un total de 8.700 autónomos e contratar unhas 160 persoas desempregadas.
Así mesmo, o Executivo galego reiterou que a orde única abarca cinco programas, con especial incidencia no sector primario, o rural e a substitución xeracional. Así, entre as principais novidades, a Consellería destacou a ampliación a dous anos da cobertura da cota cero a autónomos que inicien a súa actividade ligada á agricultura, a gandería ou a silvicultura, até 1.920 euros.
Nesta liña, a administración incidiu no aumento nun 20% da cantidade do Bono Remuda, de 1,5 millóns de euros, para "facilitar a transmisión de negocios". O programa inclúe, ademais, o Bono Nova Oportunidade —con 1,5 millóns de euros para o retorno ao autoemprego—, o Bono Autónomo —con 8 millóns de euros en investimentos para negocios que leven máis de 42 meses activos—, e a conciliación familiar, para "facilitar a actividade deste colectivo".
En concreto, 28,9 millóns de euros da orde unificada destinaranse ao programa de promoción autónomo, en base a dúas liñas: a primeira para impulsar o inicio da actividade e mantemento do traballo, e a segunda para garantir a cota cero durante 12 meses de actividade en sectores asociados á agricultura, gandería ou silvicultura.
Pola súa banda, o Bono Remuda dividirase tamén en dúas liñas: o Bono remuda rural —para negocios en municipios de menos de 10.000 habitantes— e o Bono remuda xeral, para o resto. Este bono inclúe, ademais, apoios para quen traspase o seu negocio por xubilación, entre 3.000 e 6.000 euros en función do concello no que se atope.
Así mesmo, o programa de contratación, cun total de 750.000 euros, ofrecerá apoio á contratación para cubrir permisos de maternidade ou paternidade, a contratación para o coidado de menores, maiores ou dependentes, ou para financiar servizos de coidado para persoas a cargo do autónomo.
