Milleiros de traballadores do metal colapsan os accesos ao Ifevi no primeiro día da Mindtech
Milleiros de traballadores do metal colapsaron na mañá desta terza feira o acceso principal do Instituto Feiral de Vigo (Ifevi) no día en que se inaugura a Feira Mindtech, referente da industrial do metal e tecnoloxías asociadas e organizada pola patronal, Asime. Desde as 9.30 horas, centenares de empregados do sector foron chegando ás inmediacións do Ifevi, e contra as 10.30h dúas grandes manifestacións que partiron do pavillón do Loureiro e de Panelfa confluíron na rotonda do aeroporto, impedindo a entrada ao recinto feiral nun momento no que tamén se formaron colas quilométricas na autoestrada AP-9 ao seu carón.
Axentes da Policía Nacional impediron que os miles de traballadores, que esta terza feira están en folga, accedesen ao Ifevi. Con berros de 'Convenio do metal, solución'; 'Menos feira e máis salario'; 'Mallón, cabrón, traballa de peón' —en alusión ao representante da patronal Enrique Mallón—, ou 'Asime, escoita, o metal está en loita', as miles de persoas alí concentradas exixiron á patronal melloras nas súas condicións laborais.
Así, os sindicatos volveron pedir a Asime que "escoite os traballadores" xa que "non están a pedir imposíbeis". Oportavoz de UXT, Rubén Pérez, solicitou "sentido común" na mesa negociadora do convenio para que os empresarios "traian propostas que permitan desconvocar o conflito". Pola súa parte, Celso Carnero, de Comisións Obreiras, sinalou que esta manifestación é a mostra de que os traballadores se manifestan "por vontade propia" porque "queren chegar a fin de mes".
Tamén Xulio Fernández, da CIG-Industria, reivindicou o "músculo do sector" para alcanzar un "convenio digno", polo que ameazou con máis xornadas de folga para conseguir "si ou si" o que se propoñen. Preguntado polo seguimento do paro, subliñou que a pasada quinta feira, primeiro día de folga, o paro foi "total", igual que esta terza, o que fixo que os estaleiros non puidesen operar.
A patronal defende que presentou ofertas "relevantes"
Pola súa parte, o secretario xeral de Asime, Enrique Mallón, subliñou que a patronal propuxo ofertas "moi relevantes" para tratar de "achegar posturas", cun incremento salarial de 8% en tres anos. Mais, ao seu xuízo, "parece que non se quería chegar a un acordo". Así, criticou o "erro tremendo e histórico" de convocar unha folga precisamente o día da inauguración da Feira Mindtech, polo "dano á imaxe" que pode provocar para o sector.
En declaracións aos medios de comunicación, pediu "cordialidade" e que a concentración á entrada do Ifevi "non vaia a máis" porque cre que "se hai algo extraordinariamente negativo, a sociedade vai castigar os sindicatos". Mallón destacou a importancia da feira, que contará con máis de 200 expositores e uns 10.000 visitantes, e o que se busca é que haxa "investimento, negocio e colaboración".