Seguridade Social recúa e proporá conxelar as cotas de autónomos de menores ingresos

O Ministerio de Inclusión, Seguridade Social e Migracións vai dar marcha atrás na súa proposta da semana pasada para subir as cotas dos autónomos en 2026 e proporá a súa conxelación para os tramos máis baixos de ingresos.

"A proposta coa que está a traballar o Ministerio, e para a que se está escoitando o colectivo, supón, para o ano que vén, unha conxelación dos tres primeiros tramos, da parte máis baixa da táboa", sinala a ministra de Inclusión, Elma Saiz, nunha entrevista en El País, afirmando ademais que "se fai por sensibilidade cos sectores máis vulnerábeis".

A ministra afirma que hoxe en día un autónomo que traballou toda a vida, cando chega á xubilación cobra 650 euros menos que un asalariado. Iso é inconcibíbel. "E a única maneira de paliar esa fenda é a través das cotizacións", engade.

"Eu mesma púxenme detrás da pancarta, cando era autónoma, nos gobernos de [José María] Aznar, reivindicando esa cotización por ingresos reais, que non é máis que cotizar polo que un gaña. Iso solucionouse en 2022 cunha lei votada no Congreso con 260 votos a favor, incluídos os votos do PP. Aquela lei foi tamén apoiada por todas as asociacións máis representativas dos autónomos (ATA, UPTA e Uatae)", subliña.

Saiz asegura ademais que o Goberno non se expón "de ningún modo" derrogar unha lei, a do sistema de cotización por ingresos reais, "que custou moitísimos anos sacar adiante".

O Ministerio de Inclusión volverá reunirse esta segunda feira coas organizacións de autónomos ATA, UPTA e Uatae e cos axentes sociais para seguir debatendo as novas cotas que deberán pagar os autónomos nos próximos anos no marco do sistema de cotización por ingresos reais.

A reunión, que comeza ás 11.30 horas, prodúcese despois de que a pasada semana o Ministerio presentara unha proposta para subir as cotas dos autónomos de maneira progresiva para o período 2026-2028, proposta que o Goberno español vai modificar para conxelar os tramos daqueles autónomos con menores ingresos, os que figuran na chamada 'táboa reducida'.

En concreto, Seguridade Social propuxo elevar para o próximo ano as cotas mensuais que actualmente pagan os autónomos que cotizan pola base mínima entre 17,37 euros e 206,24 euros, dependendo dos seus rendementos netos. Dentro da táboa reducida, os autónomos en base mínima con rendementos netos inferiores aos 670 euros mensuais pagarían unha cota en 2026 de 217,37 euros ao mes, fronte aos 200 euros actuais, cunha base mínima de 710,35 euros, de acordo con a formulación do Ministerio da semana pasada.

Para 2027, a cota mensual neste primeiro tramo da táboa reducida subiría a 234,73 euros e en 2028 escalaría a 252,10 euros, sempre coa proposta da pasada segunda feira na man. En dita proposta, para os autónomos en base mínima con rendementos netos de entre 670 e 900 euros ao mes, a cota mensual subiría desde os 220 euros actuais a 234,85 euros en 2026; a 249,70 euros en 2027 e a 264,56 euros en 2028.

A proposta para rendementos netos superiores aos 900 euros e até os 1.166,70 euros pasaría por elevar a cota actual de 260 euros a 271,24 en 2026; a 282,47 euros en 2027 e a 293,71 euros en 2028, de acordo co documento trasladado a pasada semana e que xerou o rexeitamento de PP, Vox, Junts, Sumar, ATA e Uatae, entre outros.