Radiografía dos soldos galegos: a fenda salarial entre Galiza e o Estado aumentou en 94 euros nos últimos cinco anos

Os custos salariais medios –que inclúen o salario base, os complementos e as horas extraordinarias en termos brutos– aumentaron 1,7% na Galiza no primeiro trimestre de 2025 a respecto do trimestre anterior –o último de 2024–, menos da metade do que o fixeron na media do Estado español, onde subiron 3,8%, segundo os últimos datos da Enquisa Trimestral de Custe Laboral (ETCL) feitos públicos esta terza feira polo Instituto Nacional de Estatística (INE). No primeiro trimestre deste ano o custo salarial –o salario medio– situouse na Galiza en 1.999,59 euros por persoa traballadora e mes, fronte aos 2.290,46 euros da media. Galiza ten o oitavo salario máis baixo do Estado, após Estremadura (1.835,71 euros), Canarias (1.872,03), Murcia (1.928,40), Andalucía (1.935,84), Castela-A Mancha (1.964,32), Cantabria (1.968,10) e Castela e León (1.979,70). A fenda entre os traballadores e traballadoras da Galiza crece en 50,42 euros por asalariada e mes a respecto do primeiro trimestre de 2024. Nos últimos cinco anos esta fenda dos salarios galegos respecto da media estatal aumentou en 94,41 euros, segundo os datos do INE de custos salariais na Galiza nos primeiros trimestres entre 2020 e 2025. Atendendo ademais ao incremento do IPC –co último dato consolidado de maio de 2025–, os soldos galegos perderon 39,99 euros de poder adquisitivo no primeiro trimestre de 2025 polo efecto do Índice de Prezos ao Consumo (IPC). O aumento do prezo do aluguer duplicou o dos salarios na última década A serie histórica dos últimos cinco anos cos datos do INE reflicte que os salarios dos traballadores e das traballadoras na Galiza seguen a sufrir unha importante fenda respecto da media estatal. No primeiro trimestre de 2020 situábase en 196,46 euros –un salario de 1.693,32 euros na Galiza e de 1.889,78 no conxunto do Estado–, a menor destes cinco anos nos que foi crecendo até achegarse xa os 300 euros. No primeiro trimestre de 2021 a diferenza destes custes salariais por traballador e mes entre a Galiza e España superou a barreira dos 200 euros, ficando en 217,12 euros menos no territorio galego. Ao ano seguinte, no primeiro trimestre de 2022, a fenda volveu aumentar até chegar aos 241,32 euros menos na Galiza. No ano 2023 os salarios galegos foron, de media, 278,41 euros inferiores que a media do Estado español. A pesar de que o ano pasado esta fenda salarial baixou no primeiro trimestre até os 240,45 euros o certo é que os datos deste primeiro trimestre de 2025 colocan a Galiza coa maior fenda salarial co Estado español dos últimos cinco anos, con 290,87 euros menos por traballador e mes. Os salarios por sectores Os salarios contabilizados trimestralmente polo INE refírense á industria, a construción e o sector servizos –exclúen actividades dos fogares como empregadores e de organizacións e organismos extraterritoriais–. Os datos do primeiro trimestre de 2025 sitúan a industria á cabeza na Galiza cunha remuneración media de 2.389,80 euros mensuais, unha cifra inferior en 273,40 euros respecto da media do Estado español, que para o sector industrial está en 2.663,20 euros. Pero é o sector servizos o que máis afonda nesta fenda. Na Galiza no primeiro trimestre deste ano os salarios mensuais alcanzaron os 1.915,72 euros, unha cifra 329,56 euros inferior á media do Estado español neste mesmo sector (2.245,28 euros). Con todo, botando a vista atrás é no sector servizos no que máis creceron os soldos galegos (+20%) desde 2020, cando non chegaban aos 1.600 euros. Salarios baixos, produtividade e fuga de cerebros: principais debilidades da economía galega malia o seu crecemento E na construción é onde na Galiza menos distan do Estado, cunha diferenza de 108,1 euros menos na Galiza. Estes salarios por traballador no país situáronse no primeiro trimestre do presente ano en 1.952,28 euros, fronte á media estatal de 2.060,38 euros por persoa traballadora e mes. Por outra parte, o custo laboral medio –todo o que paga a empresa por unha persoa traballadora, a maiores do propio salario– foi de 2.781,49 euros na Galiza no primeiro trimestre de 2025, 2,3% máis que o trimestre anterior. A xornada laboral galega Segundo os datos feitos públicos esta terza feira polo INE e relativos ao primeiro trimestre do ano, a hora de traballo na Galiza págase a 2 euros menos que a media do Estado español. O custo salarial por hora efectiva de traballo no país é de 15,29 euros –un ascenso de 1,2% a respecto do último trimestre de 2024–. Na media estatal esta suba do custo por hora efectiva de traballo foi case o dobre que na Galiza, 2,2%, situando así o prezo por hora traballada en 17,30 euros por termo medio. Os datos da Enquisa Trimestral de Custe Laboral do INE sinalan tamén que nos primeiros tres meses de 2025 a xornada laboral galega foi de 151,5 horas pactadas por traballador e mes. No conxunto do Estado español esta media foi no mesmo período de 151 horas; media hora menos. Desta xornada laboral, segundo o INE, as horas efectivas de traballo na Galiza foron 130,8, por baixo das 132,4 da media estatal. As cifras do INE elevan na Galiza a media de horas non traballadas na xornada laboral até as 21,5 horas, fronte ás 19,3 da media española. No caso dos traballadores contratados a tempo parcial as horas pactadas ascenderon en Galiza no primeiro trimestre a 87,1 horas, algo por baixo do Estado español onde a cifra foi de 89,3. Un de cada 20 postos de traballo vacantes do Estado están na Galiza A ETCL feita pública esta terza feira polo INE sinala ademais que no primeiro trimestre do presente ano houbo un total de 8.218 postos de traballo vacantes en territorio galego, o que supón 284 máis que nos tres meses anteriores, un ascenso de 3,5%. Segundo os últimos datos do INE, o incremento de vacantes na Galiza foi de 16% –1.134 máis– a respecto do mesmo período de 2024. De feito, estas 8.218 vacantes na Galiza supoñen o terceiro dato máis elevado na serie histórica –desde 2013–, só por detrás do terceiro trimestre de 2024 –con 9.093 postos vacantes– e o segundo trimestre de 2016 –con 8.332 vacantes– no país. O INE entende por vacante de emprego os postos de traballo creados recentemente ou que non están ocupados ou están a piques de quedar libres e para os que os empresarios están tomando medidas activas para atopar un candidato alleo á empresa. Coas últimas cifras do INE Galiza rexistra 5,4% do total de vacantes do conxunto do Estado español, que no primeiro trimestre rexistrou 152.885 vacantes de emprego, 2.923 máis que no mesmo trimestre de 2024. Aínda que non se especifican os datos de vacantes por sectores en cada comunidade autónoma, a nivel estatal 87,6% dos postos vacantes eran no sector servizos; 8,4%, na industria, e 4%, na construción. Os datos do INE atribúen até 87,1% destas vacantes a que non se precisa para desenvolver ese traballo ningún traballador máis, mentres 8,4% responden a un elevado custo da contratación e o 4,6% restante derívase "doutros motivos”.