As perdas da Tenreira Galega Suprema provocan outra tractorada en Lugo

Os tractores do sector da gandaría de Tenreira Galega Suprema volveron encher onte as rúas de Lugo en protesta polos recortes na política agraria común (PAC) e para dicir 'non' aos baixos prezos en orixe. A mobilización, que se iniciou ao mediodía, reiterou as demandas que xa realizaron o pasado 18 de abril na mesma localización. Gandeiras e gandeiros poñen enriba da mesa os temas que consideran “básicos” para dar continuidade a este ramo do agro galego. Gandeiros convocan unha nova tractorada en Lugo para esta quinta feira Unha mala PAC O primeiro ten que ver co que consideran “recortes” na PAC, acentuado neste período que vai de 2023 até 2027. Para o presidente Asociación de Gandeiros Galegos da Suprema, Santiago Rego, entidade convocante da marcha, a actual PAC saíu dunha “moi mala negociación”. Explica a Nós Diario que no “primeiro pilar básico, no concepto de cobro por vaca nutriz, seguimos discriminados diante dos compañeiros do leite, cobrando a metade: 85 euros desde o 2015”, sen incrementarse segundo o índice de prezo ao consumo (IPC). Ademais, considera os ecoreximes “un recorte encuberto” por exixir “máis para cobrar menos” e considerar que “a converxencia dos dereitos son á baixa”. Este gandeiro sinala que no mes de novembro realizaron alegacións diante da Xunta da Galiza mais “o período para emendas estaba fechado” polo que quedaron “sen marxe de manobra”. Hugo Martínez, gandeiro de Tenreira Suprema en Tomiño (comarca do Baixo Miño) e afiliado da Federación Rural Galega (Fruga), cualifica a Nós Diario de “insostíbel” a actual situación. Participou na anterior mobilización e apoia esta por “non mudar nada neste tempo en que as Administracións galega e española non fixeron nada mentres as letras dos bancos seguen chegando”. Unha tractorada denuncia en Lugo perdas de até 25% nas vendas de Tenreira Suprema Coñece casos doutras explotacións que “están a piques de fechar, quedando sen as propiedades que puxeron de aval cando pediron o préstamo para abrir”. En relación á PAC, sinala as “dificultades” que ten a súa realización este ano. “Non a entende nin a Administración”, asegura, “a nosa propia entidade de aconsellamento tiña un curso sobre ela ao día seguinte de tela presentado”, engade. Vender perdendo diñeiro Outro dos problemas que denuncian as gandeiras e os gandeiros é o baixo prezo da tenreira galega suprema en orixe que se suma ao aumento dos custes de produción. “Non se está cumprindo a Lei da Cadea Alimentaria que indica que non se pode vender a perdas”, explica Rego, “de nada vale sacar leis se non se poñen as ferramentas para facer que se cumpran”, considera. Asegura que "o quilo de carne de Suprema está ao redor de 5,70 euros, un euro menos do que lles custa producir, razón pola que esa cifra debería subir até 7 euros e non vender a perdas". Sobre este tema, Hugo Martínez non entende que se lle deixe pagar menos do prezo estipulado ás empresas. Nunha situación como a actual considera que na Galiza “ser gandeiro agora é algo vocacional, ninguén está por diñeiro”. Nunha circunstancia que considera “límite”, no día a día atópase con casos que para seguir traballando “teñen que vender as leiras dos pais para manter o gando ou ter que compaxinar con outros traballos”. A Tenreira Galega vende a perdas: gandeiros perden un euro por cada quilo de carne Para este gandeiro o problema cos prezos comezou co cambio de modelo que sufriu o agro galego cando os tratantes que lles mercaban vendían directamente ás carnizarías pasando polos matadoiros que lles cobraban polo sacrificio dos animais. “Agora os tratantes son empregados da industria que teñen instrucións no prezo, polo que manteñen un oligopolio, e dominan o mercado da tenreira galega”, denuncia este gandeiro. Ademais, Martínez asegura que “é imposíbel rachar ese control na Tenreira Galega, por contar a industria, a distribución e a propia Xunta da Galiza sempre coa maioría dos postos na IXP”, polo que as explotacións "non temos capacidade de decisión". Outras organizacións Desde o Sindicato Labrego Galego (SLG) apoian a maior parte das reivindicacións, aínda que consideran que se deberían “consensuar puntos que representaran a todo o sector” para contar cunha forza “máis ampla e plural”. En relación ás reivindicacións, o coordinador do sector vacún do SLG, Brais Álvarez, en conversa con Nós Diario, congratúlase de que “colla pulo a reivindicación de que a nova PAC prexudica ás gandarías galegas, algo que nós levamos dicindo durante toda a negociación anterior”. Fruga e Unións Agrarias saen en defensa da tenreira galega Pon como exemplo que “para cobrar no vacún de carne obrígase ás granxas a ser extensivas sen ter en conta modelos tradicionais”. En relación á Lei de Cadea Alimentaria, o SLG reclama “un cumprimento total e, no caso contrario, que se poñan sancións ás empresas que non o leven a cabo”. Pola contra, José Ramón González, gandeiro de Tenreira Suprema na Mezquita (comarca de Viana) e afiliado de Unións Agrarias (UUAA), desmárcase da mobilización e considera en declaracións a Nós Diario que “neste momento é máis oportuno abrir o diálogo e conseguir outros mercados”. Apunta que desde febreiro “a situación mellorou polo que é mellor abrir consensos”. Porén, coincide en que a Lei de Cadea Alimentaria “non está funcionando” como consecuencia de que “a Xunta non pon en marcha o Observatorio de Prezos".