Persoas das tendas das marcas do grupo téxtil Inditex continuaron esta sexta feira coas mobilizacións ás portas de establecementos de Zara na Coruña e Santiago e de Bershka en Pontevedra para rexeitar a modificación de horarios .
Estes cambios, “impostos pola dirección”, en palabras da CIG, foron denunciados por este sindicato diante da Inspección de Traballo. Uns cambios, afirman, que afectan tamén as traballadoras e traballadores con concreción horaria para o coidado de crianzas, o que limita a conciliación da vida laboral e familiar.
A secretaria nacional da CIG-Servizos, Transi Fernández, explicou que a pesar de que xa se celebraron varias xuntanzas coa empresa o cambio de horarios continúa, xa que a dirección se nega a dar marcha atrás nunha decisión que, segundo adiantou, podería prolongarse o que queda de ano.
Lembrou que que Inditex modificou o pasado 18 de maio, “ de forma unilateral e dun día para outro”, os horarios do persoal de tendas en todo o Estado.
Unha decisión, indica a CIG, que incluíu tamén as traballadoras que teñen redución de xornada por coidado de crianzas, o que di que supón un ataque directo contra o dereito de conciliación da vida laboral e familiar.
En consecuencia, denuncia a central, o persoal do grupo propiedade de Amancio Ortega queda sen día libre, límite de tardes e librada de fin de semana, “e nin sequera poderán gozar en moitos casos do descanso semanal mínimo que establece a lei”.
A central presentou denuncia na Inspección de Traballo, que convocou as partes a unha xuntanza. “O único que aceptou a empresa foi non modificar as vacacións de verán, que quedarán como até o de agora”.
