A CIG levará ao Parlamento galego a recuperación dos salarios no Sergas

O obxectivo de CIG-Saúde é reunir 5.000 sinaturas para levar ao Parlamento a recuperación dos complementos acordados co persoal do Sergas que o PP suspendeu en 2010.
Representantes de CIG-Saúde na rolda de prensa de onte (Foto: Nós Diario).
photo_camera Representantes de CIG-Saúde na rolda de prensa de onte (Foto: Nós Diario).

Co obxectivo de instar á Xunta a recuperar os acordos retributivos do persoal do Sergas suspendidos desde 2010, a CIG vén de anunciar que promoverá unha Iniciativa Lexislativa Popular (ILP) coa que esperan recoller a lo menos 2.500 sinaturas para levar esta petición como proposición non de lei ao Parlamento galego. 

Así o explicou o secretario nacional de CIG- Saúde, Manuel González Moreira, nunha rolda de prensa en Compostela  na que detallou que se trata de que a Administración devolva o "complemento específico" estabelecido a finais do 2008, en virtude dun acordo co bipartito de PSdeG e BNG, e que supuxo unha media de "200 euros" por profesional.

"Coa chegada do PP ao goberno, foi suspendido", lamentou Moreira. Foi en 2010, a través da lei dos orzamentos da Xunta para ese ano, cando se eliminou a "aplicación dos pactos ou acordos que supoñan incrementos retributivos", tal e como consta no texto, polas "circunstancias económicas excepcionais" que había entón.

A CIG- Saúde entende que agora se debe restabelecer o mencionado complemento, xa que a súa suspensión  "non está xustificada", porque "a situación económica cambiou" e  "o marco legal hai que respectalo", abundou. 

Neste senso, Moreira lembrou que o Goberno galego alcanzou "acordos de melloras retributivas e de condicións laborais para o persoal da Administración", pero "non" foi así cos traballadores do Sergas.

O texto da PNL que o sindicato tratará de levar á Cámara busca instar á Xunta a negociar na mesa sectorial do Sergas un calendario de recuperación destes acordos, que se faría en máis dun exercicio orzamentario para non entorpecer o "equilibrio financeiro" da Comunidade. O obxectivo dos  seus impulsores e que o debate parlamentario da mesma comece xa no mes de xuño. 

Apoia Nós Diario

Se estás lendo de balde este xornal é grazas ás máis de 3.000 persoas subscritoras. A información independente ten un prezo. Apoia un xornalismo galego e sustentábel subscribíndote a Nós Diario ou facéndote mecenas.

comentarios