Desaloxos pola ameaza do fogo para casas en Maceda e Chandrexa
O incendio no Macizo Central de Ourense continúa avanzando e nas últimas horas obrigou realizar desaloxos en vivendas nos municipios de Maceda (Allariz-Maceda) e Chandrexa de Queixa (Terra de Trives), neste último xa arden máis de 3.000 hectáreas.
A Consellaría de Medio Rural activou a Situación 2 por risco para vivendas durante a madrugada festa terza feira nas parroquias Requeixo, Vilar e Zamorela, en Chandrexa. Fixo o propio pola proximidade do fogo aos lugares de Maceda de Calveliño do Monte e Santiso.
Segundo informa o 112 Galicia a Europa Press, foi necesario desaloxar cinco veciños de dúas vivendas no lugar da Senra, en Chandrexa, durante a madrugada.
Pola súa parte, a alcaldesa de Maceda, Uxía Oviedo, relata a Europa Press que se desaloxaron catro veciños en Calveliño do Monte, onde se fixo un contrafogo para asegurar a aldea. Esta mañá de terza feira "está a avaliarse o terreo para mirar como proceder na xornada de hoxe", pero teme que "o lume vai subir cara a Montederramo".
A rexedora advirte que se trata de "un terreo moi complicado" no que xa houbo incendios no pasado. "Agora mesmo, debido á situación que está a haber en toda a provincia de Ourense, está a ser bastante complicado por parte da Xunta chegar ás necesidades de todos os incendios", expón Oviedo.
O incendio en Chandrexa arrasa máis de 3.000 hectáreas, máis que todo o que queimado na Galiza durante 2024. Segue sen controlar desde a pasada sexta feria e incorpóranse ás tarefas de extinción membros da Unidade Militar de Emerxencias (UME). Entre outros medios, foron mobilizados 14 avións e 12 helicópteros.
Por outra parte, o Ministerio do Interior, elevou a 1 a Situación Operativa do Plan Estatal Xeneral de Emerxencias (Plegem) e declarou a fase de preemerxencia ante os numerosos incendios que afectan varios puntos do Estado co obxectivo de analizar e coordinar o despregamento de recursos para axudar ás comunidades autónomas afectadas.
