Xornalista da TVG reprocha ao Bloque que non asistise ao funeral relixioso de Estado polas vítimas de Angrois

"Mais, por que non foron? Foi unha decisión en común? Foi algo que teñen nas bases do BNG? --en aparente alusión aos Estatutos-- Hai algunha prohibición expresa? Porque a cidadanía galega reclamou a presenza do BNG nese acto"

Nestes termos literais lanzou unha xornalista da TVG o seu reproche durante a rolda de imprensa en que a formación frontista reclamou que se depuren responsabilidades políticas en relación ao sinistro ferroviario acontecido na curva da Grandeira, que deixou 79 mortes.

A traballadora da televisión pública insistiu en coñecer polo miúdo as razóns que levaron ao Bloque a non facer parte dos oficios relixiosos celebrados na Catedral de Compostela. Formulou a súa pregunta despois de que o voceiro nacional do BNG tivese respostado xa a outra que, sobre o mesmo asunto, realizou un traballador de El Mundo: "por que non mandaron representación oficial ao funeral?" 

"Somos absolutamente respectuosos co acto que se celebrou, mais reivindicamos o mesmo respecto para quen non ten as mesmas crenzas ou non profesa a mesma relixión", explicou Vence. E chegou entón a batería de preguntas da xornalista da televisión pública, que pechou coa afirmación de que "a cidadanía galega reclamou a presenza do BNG nese acto".

A explicación ofreceuna desta volta o voceiro do Bloque no Parlamento, Francisco Jorquera: "a min non me consta que a cidadanía galega reclamase a presenza do BNG. Non sei cales son as fontes que vostede manexa. En todo caso, estamos nun estado aconfesional e cómpre estabelecer unha separación estrita entre os poderes públicos e o ámbito relixioso, que pertence ao privado".

"O BNG --continuou Jorquera-- tería asistido a funerais privados de vítimas desta catástrofe por respecto. Porén, non compartimos cerimonias de sometemento do público ao relixioso. Son necesarios actos de carácter civil que teñan en conta a pluralidade de sentimentos que existen nesta sociedade".

Funeral civil en Bonaval: cuarta feira, 19h

Non só o Bloque rexeitou facer parte dun funeral de Estado de carácter relixioso. Tampouco asistiu AGE. A través dun comunicado de imprensa, a coligación que lidera Xosé Manuel Beiras afirmaba que non tomaría parte "de hipócritas cerimonias espectáculo". 

Mediante unha carta remitida ao presidente da Xunta, o voceiro nacional do BNG, Xavier Vence, reclamou para esta segunda feira un funeral civil que dese comezo unha hora antes do relixioso. A proposta non foi para diante até que a presentou a presidenta do Parlamento, Pilar Rojo, nunha reunión esta terza feira en que recibiu o visto e prace dos catro grupos parlamentarios.