As vítimas do Alvia ven na reapertura da investigación “unha segunda oportunidade”
As persoas afectadas polo accidente do Alvia, inmersas neste momento nunha campaña de reivindicación para que a Comisión Europea faga público o informe do accidente, reciben como “unha segunda oportunidade” o anuncio da reapertura da investigación.
A Plataforma Vítimas Alvia 04155 espera que o xuíz instrutor da causa, Andrés Lago Louro, e mais o fiscal, Antonio Roma, “tomen nota do dito dos polos seus superiores” e que “nesta segunda oportunidade fagan as dilixencias que corresponden para que se poida facer xustiza”.
Nun comunicado enviado aos medios, a plataforma salienta que a reapertura “supón unha nova oportunidade para que se saiba a verdade e para que se depuren todas as responsabilidades”. Porén, confesan non sentirse “de todo satisfeitos”, pois a Audiencia Provincial da Coruña, órgano que ordenou a reapertura da instrución, non admitiu todos os recursos”.
As vítimas subliñan que a Audiencia “considera que existen indicios de que na curva se producía un risco de accidente por erro humano de tan intensidade que, de ter sido avaliado, tería imposto a súa minoración ou eliminación”. Tamén salientan que “hai indicios de que o método aplicado por ADIF para xestionar os perigos nese punto da liña presenta carencias que provocaron que non se tivese en conta a posibilidade de descarrilamento”.
"As empresas públicas de Renfe e ADIF antepuxeron os intereses económicos e comerciais por riba da seguridade dos viaxeiros”, di a plataforma
A plataforma cre que a Audiencia “apunta claramente os responsábeis de seguridade de ADIF” e advirte de que “como xa indicou o xuíz Luis Aláez nun auto, as empresas públicas de Renfe e ADIF antepuxeron os intereses económicos e comerciais por riba da seguridade dos viaxeiros”.
As vítimas apuntan que “quizais a presión dalgúns políticos movidos por outros intereses influíron na posta en marcha da vía e do tren sen que reunisen as axeitadas condicións de seguridade”. De aí que soliciten saber “se isto ten a ver co feito de adiantar a inauguración da liña por parte do ex ministro socialista José Blanco así como a posta en servizo do tren por parte da ministra en funcións Ana Pastor”.
Á espera do informe da Comisión Europea
A plataforma de persoas afectadas desenvolve nas últimas semanas unha campaña para que a Comisión Europea dea a coñecer o informe que redactou en relación ao sinistro e que xurdiu a raíz dunha visita organizada polo BNG a Bruxelas con representantes do colectivo.
Na xuntanza as vítimas e a representante do Bloque, Ana Miranda, tiveron a oportunidade de se reuniren con responsábeis comunitarios en materia de seguridade viaria e estes comprometéronse a preparar un informe sobre a investigación do sinistro.