Xa hai data para "acender" o Nadal de Vigo: estas son as novidades deste ano
O acto realizarase, como é "tradicional", desde a gran árbore instalada na Porta do Sol.
A iluminación do Nadal de Vigo acenderase o próximo 15 de novembro, segundo desvelou esta terza feira o alcalde da cidade, Abel Caballero, que proclamou que ese día "acéndense as luces de Nadal de todo o planeta" desde a gran árbore da Porta do Sol.
Este ano, a cidade estará iluminada con case 12 millóns de luces led instaladas en 460 rúas, ademais doutros atractivos como as montaxes lumínicas en 3D, a casa do Papá Noel e o Carteiro Real, o Belén Monumental, a gran nora ou os mercadillos.
Novidades deste ano
Unha das grandes novidades desta edición do Nadal de Vigo é o Vialia on Ice, que combinará na praza pública do centro comercial Vialia un parque de atraccións de xeo onde destaca a instalación de dúas pistas de xeo —unha para adultos e outra para o público infantil—, un tobogán con sete metros de altura e 25 metros de percorrido e un tren infantil de Nadal.
Outra das novas incorporacións é a colocación dun cocheiro a unha das grandes figuras que máis fotografías acaparan no Nadal de Vigo. Trátase do carro de cabalos máxicos, situado en Policarpo Sanz xunto á rúa Carlos Oroza.
O alcalde vigués convidou a "todo o mundo, en toda España, en toda Europa, en todo este planeta" a acudir á cidade durante o acendido e durante o resto da campaña do Nadal, que adoita estenderse uns dous meses.
O BNG pide "evitar o caos circulatorio"
O Bloque Nacionalista Galego pide que o Goberno de Abel Caballero faga públicas as medidas de mobilidade para o Nadal de Vigo deste ano. A fronte nacionalista demanda un “verdadeiro” plan de tráfico que evite "o caos circulatorio e as situacións de inseguridade que se viviron en anos anteriores".
O portavoz municipal do BNG, Xabier P. Igrexas, asegurou que "non se coñece aínda nada da planificación a pesar de que o Concello xa iniciou os perímetros para a instalación de ornamento en ámbitos como a avenida García Barbón". Alertou tamén da "preocupación polo anuncio dun segundo mercado de Nadal na praza de Vialia, onde teme un colapso de tráfico ao sumarse ás visitas do centro comercial e á estación ferroviaria".
"Queremos saber que medidas vai adoptar o Goberno local para evitar que, un ano máis o modelo caprichoso de Caballero, converta o Nadal nun calvario insoportábel e inseguro", manifestou Igrexas. A ese respecto, advertiu da ineficacia en anteriores edicións para garantir un tránsito seguro de vehículos e peóns. "Non abonda cun par de planos ou anuncios que nunca se concretan en nada, hai que tomar medidas de verdade", esixiu.
Dende o Bloque trasladaron propostas como o deseño dun plan de transporte público que reduza a entrada de vehículos na cidade. Entre as medidas, piden habilitar lanzadeiras de bus e aparcamentos disuasorios no IFEVI, acordando o uso de parte do estacionamento do aeroporto e tamén de zonas do propio Porto de Vigo. Nesa mesma liña, dar preferencia semafórica ao paso dos buses e facilitar o acceso de taxis.
