Viaxe ao país nipón: un percorrido polos pratos máis famosos da gastronomía xaponesa

A cociña xaponesa é coñecida principalmente polo sushi, tremendamente popular no noso país nos últimos anos e que continua en aumento. Trátase dun prato exótico pero tamén san e nutritivo. Sushi O sushi é o prato xaponés por excelencia. Elabórase aderezando arroz cocido cun mollo chamado sushi-zu, feito a base de vinagre de arroz, azucre e sal. Emprégase unha variedade pequena, redonda e cunha gran cantidade de amidón. Unha vez frío combínase este arroz con diferentes ingredientes como peixes, mariscos, algas ou verduras. Para preparar o arroz é moi importante lavalo ben antes para tirarlle o amidón. Lávase nun cunco baixo a billa e imos remexendo coa man e tirando a auga, así nove veces se é preciso para que saia clariña. Despois de lavalo temos que deixalo repousar un anaco para que se infle ben e cocelo co mesmo volume de auga que de arroz. Unha vez cociñado mestúrase co mollo de vinagre de arroz, sal e azucre en quente e déixase repousar estendido. O termo 'sushi' é unha palabra xenérica que engloba diferentes elaboracións. Algunhas das mais coñecidas son os makis, uramakis ou nigiris. Todas elas se fan con arroz, pero de diferente xeito. En primeiro lugar temos os makis, se traducísemos literalmente do xaponés sería algo parecido a rolo. Son os máis famosos e fanse con arroz recheo de peixe ou verduras enrolados en alga nori. O contrario a estes serían os uramaki, a palabra 'ura' significa a cara oposta, e como o seu nome indica é un maki ao revés. Neste caso o arroz é a cara de fora e por dentro temos alga nori rechea de peixe ou verduras. Por último os nigiris fanse sen alga nori, son pezas de arroz cuberta de peixe cru ou lagostinos. O sashimi tamén englobado no sushi, elabórase sen arroz e sen algas, son anacos de peixe cru cortado en lascas e acompañado dun mollo, xeralmente soia. Todas estas elaboracións poden facerse con diferentes ingredientes. Entre os peixes, os máis consumidos son o atún e o salmón, mais tamén se poden empregar xurelos, sardiñas ou luras. Como acompañamento destes adoitan ir unha gran variedade de produtos, o máis común é o cogombro ou o aguacate, pero hainos con manga ou incluso queixo. Ensaladas No Xapón é moi común o consumo de algas, unha das máis empregadas é a alga wakame, que tan só aderezándoa cun chisco de vinagre e unhas sementes de sésamo está boísima. Outra opción é outra coñecida receita xaponesa, trátase do sunomomo. É unha ensalada feita principalmente con cogombros e alga wakame aliñada cunha mestura de vinagre de arroz e mollo de soia, aínda que tamén se lle pode engadir polbo cocido ou surimi. Tanto a ensalada de wakame como a sunomomo son ideais para acompañar peixes ou carnes ou tamén como entrantes, xa que o sabor acedo do vinagre axúdanos a estimular o apetito. Son saborosas e moi sinxelas. Ramen Despois do sushi o prato xaponés máis presente en occidente é o ramen. O ramen é aos xaponeses o que o caldo aos galegos, esta especie de sopa é unha das comidas máis cotiás no país nipón e hai unha chea de variedades, en cada restaurante ou casa se fai dun modo diferente. É un prato salgado, algo graxo e con moito sabor. O básico dun bo ramen é ter un bo caldo de base, feito xeralmente con polo, ademais doutro mollo que se emprega para condimentalo e darlle sabor. Este mollo é coñecido co nome de tare e pode ser de diferentes tipos. Os máis comúns son de salsa de soia ou miso, unha pasta de sabor intenso feita con sementes de soia, cebada ou arroz fermentadas. Cando teñamos o caldo pronto precisaremos uns fideos para ramen e acompañamentos ao gusto. Os fideos fanse con fariña de trigo, poden ser frescos ou secos e cócense á parte. Á hora de servir colócanse no prato e sobre estes botamos o caldo e os complementos. Como acompañamento temos moitos onde escoller: ovos mariñados, brotes de bambú, porros, brotes de soia, setas, algas… O ramen é un prato cun gosto potente, moi completo e moi reconfortante, ideal para entrar en calor un día de frío. Mochi A gastronomía xaponesa é única tamén nos seus doces. Se cadra o que máis nos sona son os doroyakis, os boliños que comía Doraemon. Son uns pasteliños recheos feitos con fariña, ovo e azucre. Aínda que todos pensabamos que o recheo era de chocolate pola cor similar, o orixinal é unha pasta de feixóns chamada anko. Despois dos doroyakis, a lambonada do país do sol nacente que atravesou máis fronteiras son os mochi. Son un doce tradicional redondiño e gomoso que se elabora, como non, con arroz. Na súa orixe era unha especie de ofrenda que lle facían aos deuses e posteriormente converteuse nun doce típico da festa do aninovo, aínda que actualmente se consome durante todo o ano. Tradicionalmente cocíase o arroz glutinoso e moíase nun gran morteiro de pedra ou madeira golpeándoo cun martelo até quedar unha fariña fina. Este traballo constitúe unha cerimonia que recibe o nome de Mochitsuki. Para esta celebración precísanse dúas persoas, unha para golpear con forza o arroz e outro para movelo e mollalo, traballan xuntos nunha especie de danza perfectamente sincronizada. Unha vez temos a masa pegañenta, fanse boliñas e rechéanse. O recheo máis tradicional é o anko, a pasta de feixóns dos doroyakis de Doraemon, pero hoxe en día temos multitude de sabores: de froitas como a manga, de chocolate, té matcha ou incluso de xeado. Os mochis, o ramen ou os diferentes tipos de sushi son só unha pequena mostra das delicias que podemos atopar no Xapón, unha gastronomía tan rica que non deixa de sorprendernos.