Unha veciña de Viveiro relata o "calvario" que vive desde 2023: incontinencia, dores por todo o corpo e sen cita médica até 2026
Un accidente de tráfico no ano 2023 deixoulle graves secuelas que lle impiden desenvolver unha vida normal. Dores físicas en numerosas partes do corpo, incontinencia urinaria e fecal, hernias... e sen cita médica para buscar unha solución até abril de 2026. Marifé Pajón, veciña de Viveiro (A Mariña) de 57 anos, relata a Nós Diario o "calvario" que vive e que por mor das listas de agarda na sanidade pública non ve solución a curto prazo.
"Un señor de 80 anos levoume por diante no coche. Inicialmente leváronme en ambulancia ao hospital. Tiña síntomas pero dixéronme que non era importante e mandáronme para a casa. Despois apareceron os problemas", lembra Pajón. "Teño incontinencia urinaria e fecal, as cervicais mal, rompín o tendón dereito; teño os dous brazos e unha man. Saiume unha hernia inguinal por levar o cinto posto", enumera uns síntomas que padece desde 2023, cando se produciu o accidente.
Pajón está á espera de saber se se ten que operar ou non, e á espera de coñecer cal é a "gravidade" da súa situación. Logo de facer probas no Hospital da Mariña, en Burela, e no Hospital Lucus Augusti, en Lugo, a diagnose poderaa coñecer en abril de 2026, para cando o Servizo Galego de Saúde (Sergas) lle deu cita, case tres anos despois do accidente de tráfico que lle truncou a vida.
A consecuencia de estar tanto tempo de baixa, na empresa na que estaba traballando como comercial despedírona. "Agora estou atravesando unha depresión. E así sigo con todo, e cada vez con algo máis", lamenta.
Marifé Pajón pide que a atendan na sanidade pública para intentar buscar unha solución ao seu problema. Conta que, como en Atención ao Paciente non a puideron axudar, chamou directamente á Dirección do centro hospitalario, conseguindo unha cita en Tramatoloxía "á semana". Mais iso foi unha vez, "agora xa nada, xa nin me collen o teléfono". "Non pode ser que para conseguir que me atendan no médico teña que estar chamando a Dirección".
A historia de Pajón é unha máis das que integran as crecentes listas de agarda do Sergas, unha situación que se agrava especialmente no verán ao non cubrir Sanidade as baixas, vacacións e outras ausencias do persoal facultativo. "Non é xusto, eu o que quero é verme ben, encontrarme ben", reclama Marifé Pajón.
