A vacina de AstraZeneca segue a ofrecer "máis beneficios que riscos" e é "segura"
O Ministerio de Sanidade anunciou na segunda feira a suspensión "cautelar" da administración das vacinas de AstraZeneca por un período de 15 días, após notificarse en diferentes países da Unión Europea, incluído o Estado español, casos puntuais de trombose "temporalmente relacionados" con estes viais. Na Galiza, porén, non se terían rexistrado aínda "reaccións adversas graves" en ningunha das persoas que recibiron a primeira das doses.
Países como Francia, Alemaña, Italia ou Portugal decidiron tamén paralizar de forma temporal a vacinación con AstraZeneca. Outros, en cambio, optaron por continuar. É o caso de Australia, Bélxica ou Reino Unido, onde se desenvolveu o fármaco (Universidade de Oxford).
Con todo, a Axencia Europea do Medicamento (EMA, nas súas siglas en inglés) asegurou na terza feira que os beneficios desta vacina "superan os riscos dos efectos secundarios", e que aínda non se acharon "indicios" que evidencien unha relación de causalidade entre a súa inoculación e o xurdimento de coágulos sanguíneos. Tamén a Organización Mundial da Saúde (OMS) recomendou aos países proseguir a vacinación.
"Todos os fármacos teñen algún risco"
África González, catedrática de Inmunoloxía da Universidade de Vigo con case tres décadas de experiencia neste campo, explica a Nós Diario que calquera fármaco, "até a aspirina ou os anticonceptivos", entraña algún risco: "A vacina probouse en perto de 30.000 de persoas e os efectos secundarios detectados eran leves e perfectamente asumíbeis, como cansazo ou febrícula, mais é lóxico que, após administrala a máis de 17 millóns de persoas, aparezan outros novos. Haberá que determinar se quen sufriron os trombos tiñan algunha patoloxía previa".
Malia que concorda coa decisión do Estado de adiar a vacinación con AstraZeneca para "estudar en detalle os casos e facer unha vixilancia", fai un chamamento á "calma". "Non hai datos que demostren que sexa máis perigosa que as de Pfizer ou Moderna, e de feito países como Reino Unido, que xa administrou millóns de doses, non consideran que exista relación entre a vacina e a trombose", argumenta.
Na mesma liña apunta o xefe de Pediatría do Complexo Hospitalario Universitario de Santiago (CHUS) e coordinador do centro colaborador da OMS en seguridade vacinal, Federico Martinón-Torres, quen traslada á poboación unha "mensaxe de tranquilidade". "Houbo un número moi reducido de fenómenos tromboembólicos que coincidiron no tempo coa vacinación, e agora, simplemente, estase a pescudar unha posíbel causalidade", sostén.
A segunda dose
Nas últimas semanas, milleiros de galegos e galegas recibiron a primeira dose de AstraZeneca, mais Martinón-Torres asegura que a interrupción cautelar non será un problema: "A segunda pódese administrar até 12 semanas despois, e, se por calquera motivo a suspensión continuase, as autoridades sanitarias proporían completar a pauta con outra vacina", expón, e engade que, se algunha destas persoas tiver síntomas persistentes, deberá consultar ao seu médico.
A vacina Sputnik V continúa sen recibir o visto e prace da UE
A finais do mes de febreiro este xornal adiantou que a farmacéutica Zendal e o grupo Iberatlantic Global Corporation amosaron ante o Ministerio de Industria a súa "dispoñibilidade" para fabricar no Porriño a vacina rusa Sputnik V.
Porén, as autoridades sanitarias europeas aínda non autorizaron o seu desembarco na UE. "Os procedementos para aprobar unha vacina non só exixen unha determinada información burocrática sobre a súa efectividade e posíbeis riscos, senón que é preciso tamén realizar unha serie de informes de farmacoloxía posteriores", relata África González, en referencia á documentación que a UE segue a demandar a Rusia. "Temos un sistema moi garantista, que ten a vantaxe da seguridade que xera, mais tamén resta rapidez", conclúe.