A situación é "grave": Veciñanza de Aguiño e Ribeira denuncia esperas de até tres semanas para obter unha cita en Atención Primaria

Centos de persoas concentráronse esta sexta feira na parroquia ribeirense de Aguiño (O Barbanza) para reclamar unha “sanidade pública digna”. A protesta contou co apoio do BNG local que reafirmou ademais o seu “compromiso” para conseguir a cobertura completa das prazas de persoal sanitario nos seus centros de saúde.

E é que día de hoxe, os consultorios de Ribeira e Aguiño carecen de catro médicos e un profesional adicional no Punto de Atención Continuada (PAC), unha situación que está a provocar esperas de até tres semanas para obter unha cita. Ademais, moitas persoas vense obrigadas a recorrer a servizos xa saturados, como o PAC ou as Urxencias do Hospital do Barbanza.

O caso de Aguiño é especialmente “grave”, xa que chegou a quedar sen ningún médico dispoñíbel. A solución provisional da Consellaría de Sanidade foi trasladar unha médica desde Ribeira, unha medida que só "transvasa o problema dunha localidade a outra, sen achegar unha solución real”, afirma o alcalde de Ribeira, o nacionalista Luís Pérez Barral, que participou da protesta decorrida esta sexta feira en Aguiño.

Pilar Millet, a portavoz da veciñanza, confirma esta situación a Nós Diario. “Moitas veces a doutora que atende en Aguiño só está catro horas. Se te atopas mal fóra desas catro horas tes que ir a Ribeira e alí hai o mesmo problema: non hai médicos suficientes”, explica. “O seguinte é acudir ao hospital, que tamén está saturado, pero é a única maneira de que che atendan”.

Mais o problema “non é só este”, senón que, con frecuencia, a atención sanitaria non é nin de catro horas. “Levamos toda a semana sen médico”, sinala Millet, que tamén cualifica a situación como “moi grave”.

O rexedor ribeirense destaca que o Goberno local enviou varios escritos ao conselleiro de Sanidade solicitando a cobertura inmediata das dúas prazas vacantes no consultorio periférico de Aguiño. Unha destas prazas quedou vacante por xubilación do titular, e a outra correspóndese cunha baixa de longa duración.

Actualmente, unha soa doutora está atendendo en Aguiño para cubrir dúas ausencias, o que provoca que haxa pacientes que non poidan recibir atención sanitaria nin obter cita en Atención Primaria, engadiu o alcalde. "Estarei ao lado dos meus veciños o tempo que faga falta, porque o primeiro ao que me debo como alcalde é aos seus intereses. Reclamarei sempre o que é de xustiza e un dereito básico e esencial como é a saúde”, conclúe Pérez Barral.

Desde a formación nacionalista lamentan as declaracións do Partido Popular no Parlamento galego, nas que se acusaban a veciñanza de Aguiño de ser “hostil” co Goberno da Xunta da Galiza.

Con todo, para o BNG, mais que “hostilidade” que sinala a Xunta, o que denota a mobilización da veciñanza ribeirense é “o profundo malestar da cidadanía pola falta de recursos sanitarios”. “É imprescindíbel que a Xunta tome nota do clamor popular e adopte medidas inmediatas que garantan unha atención de calidade. Esta loita non é só do BNG, é de toda a veciñanza de Aguiño e Ribeira, que merece unha sanidade pública forte e eficaz”, concluíron desde a formación nacionalista.