O máximo responsábel do Sergas, Julio García Comesaña, asegurou que este ano a Xunta o ten difícil para contratar persoal de enfermaría que cubra as carencias de profesionais vinculadas ás vacacións.
O tamén conselleiro de Sanidade vén de escudarse na pandemia para explicar a situación pois ao existir un “número importante” de contratacións nos servizos de Enfermaría durante todos estes meses polas necesidades engadidas pola Covid-19.
Así deixa entrever que, supostamente, non habería expertas suficientes para “a cobertura do cento por cento das ausencias”. De feito, alega que a incorporación de máis traballadoras durante todo o tempo “fai máis difícil” atender ás necesidades de todas as áreas que perden persoal no estío.
No entanto, asegurou que se traballa para “compatibilizar” o dereito ás vacacións e descanso “coa actividade asistencial”.
"Trabállase nese sentido, para que non haxa problemas e para compatibilizar a actividade asistencial co descanso dos traballadores", aclarou aos medios.
Ademais, sinalou nun acto en Vigo, que as e os enfermeiros teñen “un peso importantísimo” dentro do Sergas, se ben hai nada bateu coas críticas deste sector por non facelo partícipe das conversas para reestruturar a Atención Primaria.
Menos prazas hospitalarias
Na súa intervención, García Comesaña tamén falou do feche de plantas ou camas nos centros hospitalarios da Galiza no verán, aludindo a que se inhabilitan camas porque “hai menor demanda” e chegan as vacacións maioritarias do persoal.
Se os sindicatos falan de 135 prazas menos na área sanitaria de Vigo, é dicir, un 12,6% do total que non estaría dispoñíbel, o responsábel non quixo dar cifras concretas porque é un “número variábel”.
Aínda así, asegurou que se fan falla se poden reabrir.
