O Sergas empezará a chamar para a semana os mozos de até 21 anos para ofrecerlles a vacina contra o virus do papiloma
O Servizo Galego de Saúde (Sergas) empezará a chamar, a partir da vindeira segunda feira, 26 de maio, a 24.500 homes de até 21 anos para ofrecerlles a vacina contra o virus do papiloma humano (VPH). Así o anunciou esta terza feira o conselleiro de Sanidade, Antonio Gómez Caamaño, durante unha comparecencia no pleno do Parlamento galego, na que debullou as próximas novidades do calendario de vacinas.
O presidente da Xunta, Alfonso Rueda, xa anunciara en novembro de 2024 a elevación da idade límite de 18 a 21 anos. Agora, o conselleiro ratificou que será a partir deste 26 de maio cando empezará a chegar aos 24.500 mozos nados en 2004 e 2005.
Gripe
Gómez Caamaño tamén concretou outro anuncio de Rueda realizado, neste caso, durante o Debate do Estado da Nación, así, sinalou o conselleiro, para a campaña de inmunización 2025/26 o Sergas ampliará a administración de vacinas intranasais contra a gripe a crianzas de até 11 anos.
Ademais, porase en marcha, de maneira conxunta coa Consellaría de Educación, un proxecto piloto polo cal estas vacinas se administrarán nos centros de ensino, previo permiso das familias. Agárdase chegar a 19.200 escolares de Infantil e Primaria nacidos entre 2014 e 2022.
Polo que se refire á gripe, o conselleiro de Sanidade confirmou que a vacina de alta carga, que até agora se administraba en pacientes de 80 e máis anos, porase a partir dos 70 na próxima campaña. Isto implantarase tras os resultados conseguidos no ensaio clínico 'Galflu', para comprobar se a dose de alta carga tiña o mesmo efecto inmunizador que a convencional.
Meninxite
Así mesmo, o Sergas incorporará este 2025, de modo "pioneiro en España", a inmunización ante o gonococo en menores de 65 anos de alto risco, a través da vacina contra a meninxite B; e a vacina fronte ao dengue no programa de viaxeiros en determinadas situacións de risco e en función de factores como o destino, entre outros.
Durante a súa comparecencia, o conselleiro reivindicou a saúde pública como un "piar central" do sistema sanitario, con 41 millóns de euros nos orzamentos do presente exercicio, á vez que insistiu en que o calendario vacinal infantil da Galiza é "o máis avanzado do mundo".
