O TSXG aparta Luís Villares como relator do procedemento sobre a documentación que oculta a Xunta sobre a celulosa de Altri
A sección terceira da Sala do Contencioso-Administrativo do TSXG outorgou a Luís Villares a función de maxistrado relator no procedemento contra a Xunta da Galiza pola súa negativa a facer públicos os acordos asinados entre a sociedade mixta Impulsa e Altri. Unha resolución coñecida onte apártao do caso.
O Tribunal Superior de Xustiza da Galiza (TSXG) acordou separar Luís Villares do procedemento que debía resolver sobre a negativa da Xunta da Galiza a facer públicos os acordos asinados entre Impulsa Galiza —empresa público-privada xa extinta e creada polo Goberno galego en 2021 para captar fondos europeos e promover proxectos industriais— e o grupo portugués Altri, onde se recollían os criterios pactados pola sociedade dependente do Executivo galego e a empresa lusa para instalar unha macrocelulosa en Palas de Rei, na Ulloa.
Luís Villares, que fora designado como maxistrado relator neste caso conforme á quenda de relatorios da sección terceira do TSXG, será substituído en tal responsabilidade por César Alexis González Fernández. A decisión, á que tivo onte acceso en exclusiva Nós Diario, adoptouna o alto tribunal galego o pasado 27 de marzo, argumentando que "o actual relator", en referencia a Villares, "deixou de formar parte desta sección", en relación coa sección terceira da Sala do Contencioso-Administrativo do TSXG, cuxa composición foi modificada o 17 de marzo para apartar da mesma maxistrados —entre eles Villares— que participaran de procedementos relativos, entre outras cuestións, a parques eólicos autorizados pola Xunta da Galiza.
González Fernández, que ascendeu a maxistrado en xullo de 2025, mentres prestaba servizo en Catalunya, chegou á sección terceira da Sala do Contencioso-Administrativo do Tribunal Superior de Xustiza da Galiza desde a cuarta, especializada en procedementos económico-administrativos. A providencia coñecida onte abre a porta a que a parte demandante poida impugnar nun prazo de cinco días, mediante a presentación dun recurso de reposición, a resolución xudicial que designa González como substituto de Villlares.
A separación de Villares da causa de Altri derívase das mudanzas na composición da sección terceira da Sala do Contencioso-Administrativo do TSXG ordenadas pola nova presidenta da Sala do Contencioso-Administrativo do Tribunal Superior de Xustiza da Galiza, a maxistrada, Azucena Recio González, quen foi elixida para a responsabilidade no pleno do Consello Xeral do Poder Xudicial (CXPX) do pasado 26 xaneiro. Precisamente, Recio, nunha resolución asinada o 12 de marzo, acordaba o traslado forzoso da sección terceira á sección cuarta de Dolores López e de Luís Villares.
Recio xustificou a decisión de apartar Villares da sección terceira afirmando que "esta Sala tivo coñecemento das sentenzas ditadas polo Tribunal Supremo, en que se considera que resultou vulnerado o dereito fundamental a un xuíz imparcial, consagrado no artigo 24 da Constitución Española, que se pon en relación coa intervención na política do maxistrado don Luís Villares". Na mesma dirección, argumentou que "a finalidade última é a de salvagardar a aparencia e realidade da imparcialidade con que funciona esta Sala, composta por 18 maxistrados e maxistradas".
A decisión da presidenta da Sala do Contencioso-Administrativo do TSXG de apartar Villares e mais López da sección terceira coincide coas demandas de determinados poderes económicos, nomeadamente do lobby eólico, do Goberno galego e de diversos grupos mediáticos. Neste sentido, diferentes valoracións achegadas desde o ámbito xudicial, político e social apuntaban que a decisión de Recio podería deberse á tentativa de mudar a composición nunha sección encargada de dilucidar sobre procedementos tan sensíbeis como as autorizacións dos parques eólicos, as suspensións cautelares destes proxectos, as contratacións administrativas ou as derivadas legais do caso de Altri.
A causa sobre a natureza pública ou privada dos acordos alcanzados entre Impulsa e Altri é o segundo procedemento sobre o grupo portugués que deberá resolver o alto tribunal galego. O litixio ten a súa orixe na negativa do Goberno galego en dar a coñecer os termos dos pactos entre a Xunta da Galiza e a pasteira lusa, tal e como lle levan demandando desde hai anos os grupos da oposición parlamentaria e as forzas sociais opositoras ao proxecto da celulosa da Ulloa. Nesta documentación resulta chave o Memorando de entendemento subscrito entre Impulsa e Atri para estudar "en exclusiva e no contexto dunha sociedade" a construción dunha "biounidade industrial".
Os contidos do Memorando poderían explicar determinadas posicións adoptadas pola Xunta na tramitación do proxecto da celulosa, así como os contrapartidas asumidas polo Goberno galego coa pasteira lusa. Unha das grandes incógnitas que agocha este documento está relacionada coa posíbeis indemnizacións económicas que o Executivo galego debería abonar a Altri no caso de non saír adiante a iniciativa, unha posibilidade que Alfonso Rueda negou no mes de febreiro.
A información sobre a que debe resolver o alto tribunal galego recolle, tamén, o expediente de "iniciativa tractora" desenvolvido por Impulsa para a transformación de madeira en fibra téxtil, así como a documentación completa do “proceso selectivo” realizado por Impulsa que deu lugar á escolla de Altri.
A Alianza Rural rexeita os cambios no alto tribunal galego
A Alianza por un Rural Galego Vivo, conformada pola Asociación para a Defensa Ecolóxica de Galiza (Adega), a Organización Galega de Montes Veciñais en Man Común (Oragaccmm), a Federación Rural Galega (Fruga) e a Confederación Intersindical Galega (CIG), requiriu onte á Presidencia do Consello Xeral do Poder Xudicial (CXPX) que adopte as medidas oportunas para instar o Tribunal Superior de Xustiza da Galiza (TSXG) a anular o traslado de maxistrados e maxistradas da sección terceira da Sala do Contencioso-Administrativo do TSXG, entre eles Luís Villares, por vulnerar “os dereitos das entidades recorrentes que defenden dereitos colectivos e que teñen litixios en curso en dita sección”.
As entidades que integran a Alianza manifestaron a súa "profunda preocupación" polos posíbeis “efectos de indefensión que esta sorpresiva e radical modificación da composición da maxistratura da sección terceira da Sala do Contencioso-Administrativo pode exercer sobre os intereses colectivos” que as entidades sociais representan, tendo en conta que a maioría das causas recorridas polas mesmas recaeron nesa sección terceira. A este respecto, criticaron a "improcedencia" da modificación da composición da sección "no contexto actual no que se produce".
