O prezo da vivenda en aluguer na Galiza continúa en aumento e, con respecto a outubro do ano pasado, é 7% máis cara. Ademais, tamén se eleva en comparación do mes anterior 2,2%, o que segue a mesma tendencia que a media e atópase actualmente en 8,44 euros por metro cadrado, segundo os datos do Índice Inmobiliario Fotocasa. É a sétima suba detectada en 2023.
No conxunto do Estado, o prezo da vivenda en aluguer situouse en 11,23 euros por metro cadrado no mes de outubro, cifra 7,1% superior á do mesmo mes de 2022 e 0,7% por riba da do mes de setembro.
Por provincias, en tres das catro increméntase o prezo interanual da vivenda, de maneira que na Coruña sobe 9,3%; en Pontevedra, 4,7%; e en Ourense, incrementouse 4,5%.
Se se ten en conta o prezo, Pontevedra é a máis cara, con 9,30 euros/m2 ao mes; seguida da Coruña, con 8,59 euros/m2 ao mes; Ourense con 6,52 euros/m2 ao mes; e Lugo, con 6,37 euros/m2 ao mes.
En todos os concellos analizados o prezo das vivendas en aluguer incrementou respecto ao ano anterior. Oleiros é a que máis incrementos acumula en outubro con 17%. Séguenlle, A Coruña, con 10,6%; Ourense (10,4%), Compostela (9,9%), Ferrol (8,4%), Vigo (5,9%), Pontevedra (5,0%) e Lugo (2,0%).
A orde dos municipios por prezo é: Sanxenxo (13,87 €/m2 ao mes), A Coruña capital (10,43 €/m2 ao mes), Oleiros (9,70 €/m2 ao mes), Santiago de Compostela (9,69 €/m2 ao mes), Vigo (9,67 €/m2 ao mes), Pontevedra capital (8,37 €/m2 ao mes), Vilagarcía de Arousa (7,52 €/m2 ao mes), Ourense capital (6,81 €/m2 ao mes), Lugo capital (6,76 €/m2 ao mes), Ferrol (6,30 €/m2 ao mes) e Narón (6,17 €/m2 ao mes).
