A conselleira de Política Social, Fabiola García, no marco da súa comparecencia no Parlamento galego a petición propia para explicar as liñas estratéxicas do seu departamento, lanzou unha oferta de "pacto" aos grupos políticos para un novo modelo de residencias na Galiza e a futura lei de impulso demográfico.
No mesmo pleno desta terza feira, 20 de outubro, os votos contrarios do PPdeG serviron para rexeitar unha iniciativa do BNG que instaba á Xunta a remitir á Cámara os 32 expedientes abertos a residencias de maiores en inspeccións realizadas pola Consellería de Política Social.
A deputada nacionalista Olalla Rodil solicitou ao Goberno galego a remisión de toda a documentación correspondente a estes expedientes e criticou que o Executivo autonómico "non facilite datos desagregados" por "estar máis cómodo na opacidade que na transparencia".
A deputada nacionalista, tras volver criticar que o PP rexeitase investigar nunha comisión parlamentaria o sucedido nestes centros, propuxo ampliar os cribados que se están levando a cabo de forma que non se limiten ás residencias e que tamén inclúan aos centros de menores e a todo o persoal do Servizo de Axuda non Fogar (SAF).
Investigación na Comisión Europea
A Comisión Europea iniciará unha investigación preliminar sobre a situación das residencias de maiores privadas situadas na Galiza durante a pandemia despois de que Esquerda Unida (EU) a denunciase. En concreto, a formación dirixiuse á Comisión de Peticións da Eurocámara para solicitar que se investigasen "a falta de medios e a vulneración dos dereitos das persoas de idade avanzada" en residencias galegas.
Tamén pediu que se abordase "a súa discriminación na asistencia sanitaria" durante o estado de alarma. o BNG en Europa, Ana Miranda, informou de que presentará unha denuncia na Comisión de Peticións da Eurocámara sobre a situación das residencias de maiores durante a pandemia.
