As persoas de entre 55 e 80 anos mostraron menos síntomas depresivos durante o confinamento por Covid-19, segundo indica un estudo liderado polo grupo de investigación en Alimentación, Nutrición e Desenvolvemento Mental da Universitat Rovira i Virgili (URV).
O estudo analiza como afectaron as restricións da pandemia a persoas con síndrome metabólico que participaban no proxecto Predimed-Plus, informa a URV nun comunicado.
O equipo investigador decidiu explorar o impacto do confinamento en persoas adultas maiores ante a "controversia de resultados de estudos anteriores, que non chegaban a unha conclusión clara" sobre o impacto das restricións no aumento de síntomas depresivos.
Para iso, deseñaron un cuestionario sobre o grao de confinamento que pasou cada persoa no cal incluíron aspectos como o ambiente físico -dimensións e condicións da vivenda, frecuencia en que saían de casa durante o confinamento, entre outros- e de contacto social -número de persoas que vivían na mesma casa e situación laboral-.
Motivos
Segundo o estudo, esta diminución de síntomas depresivos explícase por distintos factores, como que as persoas de idade avanzada poderían verse menos afectadas polas consecuencias sociais e económicas da pandemia que as máis novas.
A investigadora Indira Paz-Graniel explicou que outro dos motivos é que as persoas que xa tiñan un diagnóstico de depresión antes da pandemia demostraron ser máis resistentes "porque contaban con coñecementos previos sobre estratexias de xestión emocional e conexión social".
Ademais, o equipo investigador indicaron que aquelas persoas con síntomas depresivos e maior risco de complicacións por Covid-19 poderían atopar un alivio nas restricións de mobilidade e interaccións sociais.
