Permanece cortada en ambos os sentidos a autoestrada entre Ourense e Compostela á altura de Dozón por mor dun incencio
A AG-53 e a AP-53, que conectan Ourense e Santiago de Compostela, permanecen cortadas en ambos sentidos entre os quilómetros 56 e 63, nos termos municipais de Piñor (comarca do Carballiño) e Dozón (O Deza), por mor dun incendio forestal, polo que se estabeleceu a N-525 como vía alternativa.
Desta maneira, varios usuarios e usuarias tiveron que cambiar a súa ruta por mor de que as autoridades están impedindo que os vehículos poidan acceder ao tramo de estrada afectado polo fogo, o que está xerando unha situación complicada para o tráfico na contorna.
🔥 O fume dun incendio obrigou a cortar a autoestrada entre Santiago de Compostela e Ourense en ambos os sentidos
— Nós Diario (@NosDiario) August 12, 2025
📹 Carlos Morais
👉 Máis info: https://t.co/XLUoPYSydJ pic.twitter.com/PwDsni7sKB
A proximidade do incendio que obrigou a cortar a AG-53 e a AP-53 a unha gasolineira na localidade de Dozón obrigou tamén a desaloxar a mesma, nunha situación que tamén xera preocupación polo combustíbel almacenado na estacións de servizo.
Tamén cortado un tramo da N-525
A Subdelegación do Goberno español en Ourense informou posteriormente de que se cortou totalmente tanto a autovía AGAG-53 (empregada para conectar Santiago con Ourense), punto quilométrico 59, como a estrada N-525 ao seu paso por Dozón, quilómetro 275, por un incendio en Situación 2.
A Consellaría do Medio Rural activou a Situación 2 por un incendio activo que ameaza casas no núcleo de Castro. Ademais, a conexión entre Santiago e Ourense tamén está cortada en tren, sen circulación por un incendio con varios focos próximos á vía na cidade das Burgas que obrigou a desaloxos da veciñanza en Seixalbo.
O Centro de Coordinación de Medios está situado no polígono de Dozón e o Centro de Coordinación Operativa (Cecop) no edificio administrativo da Xunta en Pontevedra. No operativo participan patrullas da Garda Civil de Lalín e Vila de Cruces e Seprona da Estrada, así como efectivos de Ourense por tratarse dunha área limítrofe, ademais dos efectivos de Medio Rural.
