O xulgado investiga o presidente da comisión de festas de Matamá polo accidente mortal do 'Saltamontes'
O Xulgado de Instrución número 3 de Vigo citou como investigado ao presidente da comisión de festas de Matamá, Cristian González, así como á propia entidade polo accidente mortal ocorrido en agosto do ano pasado na atracción de feira 'Saltamontes'.
Segundo fontes do Tribunal Superior de Xustiza de Galicia (TSXG) consultadas por Europa Press, foron citados como investigados por un presunto delito de lesións. Por iso, acudirán a declarar nas próximas semanas, aínda que se descoñece a data concreta. Precisamente hai un mes coñecíase que a xuíza tamén citou a declarar como investigado o propietario do 'Saltamontes' no que se produciu a traxedia.
Foi na madrugada do venres para o sábado, 3 de agosto, cando un mozo de 36 anos faleceu nas festas de Matamá, en Vigo, tras romper un brazo da atracción de feira e quedar encaixado na estrutura, atrapado entre a cabina e o valado do enxeño mecánico. O home, veciño da cidade olívica e natural de Viana do Bolo (Viana), faleceu debido ao impacto. A muller que o acompañaba saíu ilesa do accidente.
A partir de aí, comezou unha investigación xudicial para esclarecer o ocorrido. Agora, a xustiza imputa o presidente da comisión de festas, a entidade e o propietario do 'Saltamontes'.
Desautorizada polo Concello
A atracción feiral sinistrada en na parroquia de Matamá estivera operativa uns días antes, nas festas de Beade, tamén na cidade olívica, e nese caso tamén o fixo sen autorización municipal.
Tal e como figuraba no expediente relativo aos festexos de Beade, que se celebraron do 25 ao 28 de xullo de 2024, a solicitude para a instalación do mecanismo na contorna da igrexa de Santo Esteban de Beade foi denegada polo Concello debido a que resultaba incompleta a documentación achegada. Con todo, esta atracción funcionou eses días en Beade, segundo denunciou entón o grupo municipal do PP, que sinala que se trata da mesma atracción que, pouco despois, foi instalada en Matamá, onde tamén operou sen licenza, denegada polo mesmo motivo.
No informe-proposta do departamento municipal de Seguridade que figura no expediente das festas de Beade constaba que "o Concello de Vigo non dispón do Plan de Inspección de espectáculos públicos e actividadaes recreativas segundo a disposición final cuarta da Lei 7/2017 de espectáculos públicos e actividades recreativas da Galiza", e que tampouco dispón "dos medios para a inspección e comprobación que acredite que as instalacións e montaxes reúnen as medidas necesarias de seguridade e solidez de todos os seus elementos".
No caso das festas de Matamá, nas que un dos brazos dese 'Saltamontes' se desprendeu e causou lesións mortais a un veciño da cidade, no expediente tamén figura que a instalación desta atracción non estaba autorizada.
