Un home morreu na madrugada deste sábado en Vigo ao desprenderse un dos brazos da atracción O Saltamontes, na que viaxaba acompañado da súa muller.
Aconteceu arredor das 2 horas no marco das festas da parroquia viguesa de Matamá. Ao soltarse o brazo da atracción, o home, duns 35 anos, quedou atrapado entre a cabina e o valado do enxeño mecánico e acabou falecendo debido ao impacto. A muller saíu despedida da atracción mais ficou ilesa.
Até o lugar desprazouse un operativo do Parque de Bombeiros de Teis —pois o de Coruxo, a pesar de estar máis perto, atópase fechado até as 22 horas deste sábado por falta de operativos—, así como servizos sanitarios, Policía Local e Policía española.
Suspensión das festas
O suceso causou gran conmoción entre a veciñanza presente no recinto feiral, e a Comisión de Festas decidiu no mesmo momento suspender toda a programación dos festexos parroquiais para a totalidade da fin de semana.
Cunha mensaxe nas súas redes sociais, Matamá en Festas anunciou a suspensión das festas debido “ao tráxico accidente sucedido” e trasladou o seu pésame á familia do home.
