A declaración do ex xefe de seguridade da Axencia Ferroviaria Europea (ERA polas súas siglas en inglés), Christopher Carr, concluíu despois de oito horas de interrogatorios.
Nunha xornada na cal as vítimas volveron concentrarse ante a sede xudicial, nesta ocasión cunha pancarta reivindicativa, a comparecencia de Carr comezou poucos minutos despois das 9.30 horas e prolongouse até as 17.30 horas, tras un receso de 30 minutos e outra media hora na cal o xuízo tivo que ser interrompido.
Tras as preguntas dos avogados da plataforma e a asociación de vítimas, o fiscal e outras partes, xa entrada a tarde chegou a quenda dos letrados que representan as aseguradoras Allianz (Adif) e QBE (Renfe), e o da defensa do ex cargo de Adif procesado, Andrés Cortabitarte.
Finalmente interveu un dos avogados que exercen a defensa do maquinista Francisco Garzón, o outro procesado, ante os que Carr avalou a tese de que a avaliación da liña debería ter en conta a normativa de prevención de riscos laborais.
"Cando facemos unha avaliación de riscos hai que ter en conta os individuos en xeral, non se fai diferenza entre pasaxeiros e condutor", sostivo este responsábel.
Ademais, á cuestión de se Renfe debeu efectuar unha análise de riscos para un servizo seguro, precisou que "as dúas organizacións" terían que facelo, tanto a operadora como Adif. "Trátase dun risco compartido", incidiu.
Carr engadiu matices á súa declaración neste extremo ao apuntar que "ás veces si" que o maquinista pode funcionar como barreira perante un risco, xa que "os condutores son unha parte moi importante do sistema de seguridade". "Dependemos do condutor", constatou.
A cuestión é, segundo advertiu, "que risco se lles pide que xestionen e como de razoábel é que se lles pida que asuman eses riscos".
Alta velocidade?
Ao comezo do interrogatorio, Christopher Carr indicou que a ERA concluíu que o punto do accidente considerábase "fóra da liña de alta velocidade", pero aclarou que o entenderon así pola información recibida da CIAF (a comisión de investigación de accidentes ferroviarios).
"Cando recibimos o informe da CIAF reunímonos con representantes e técnicos españois e aseguraron que este tramo está fóra da liña de alta velocidade", explicou Carr. "Pero non é parte do noso informe, centrámonos en analizar o informe da CIAF", apostilou.
