Centos de persoas converxeron na mañá do domingo na muralla de Lugo para construír unha cadea humana con bandeiras da Patria cando se fai o primeiro centenario do izado oficial dunha bandeira galega nun edificio público, o Pazo municipal da Coruña en 1921, nun evento organizado polo Proxecto Estreleira.
Os impulsores da conmemoración destacan a importancia da cidade de Lugo para a loita pola liberdade da Galiza, lembrando a I Asemblea Nacionalista de 1918, que o sábado homenaxeou Vía Galega.
Ao tempo, desde a muralla humana de estreleiras foron despregadas bandeiras xigantes da Patria, do Reino Suevo da Galiza, do Antigo Reino e da serea de Castelao, nunha xornada que amenizaran desde horas antes os cuartetos de música da Gentalha do Pichel e de Trasancos.
Enchéronse 15 dos 22 tramos que cubrían o perímetro da muralla, polo que a entidade fai unha valoración moi positiva, afirmando que “foi un importante logro loxístico e organizativo. Houbo moi bo ambiente, alegría, optimismo e emoción”.
Antes de que as e os participantes se dirixiran cara a praza da Catedral en dirección ao acto de feche, produciuse o paso de dúas crianzas con cadanseu carballo pola muralla, flanqueadas por varios gaiteiros, acompañando o ambiente festivo que se viviu, coa participación de múltiples familias e de persoas de diversos eidos do nacionalismo galego.
Entre regueifas de Lupe Branco, Regueifeiras da Semente e Sechu Sendo, e a actuación musical de Mero, Xurxo Souto e Isabel Risco presentaron o acto reivindicando o compromiso popular reflexado no nome da convocatoria do acontecemento: “Adiante Galiza, somos unha naçom”.
O final do evento deu paso ao xantar e a convivencia entre as persoas asistentes no mercado de abastos lucense, que puxo o punto e final á xornada.
Proxecto Estreleira
O Proxecto Estreleira deuse a coñecer o pasado 27 de xuño no cumio do Pico Sacro, onde presentou un programa para resolver "o déficit na difusión dos símbolos que nos identifican como pobo e a crecente ocupación do espazo público e naturalización da simboloxía española e de extrema dereita antigalega".
A súa proposta, defenden, está baseada en accións que combinen "creatividade, imaxinación e audacia".
