Unha muller de 83 anos, quinta vítima mortal vinculada coa residencia do Incio

A residencia do Incio segue a sumar vítimas relacionadas coa Covid-19. Este sábado rexistrou un novo falecemento, o quinto desde que se detectou o gromo e o segundo en menos de 24 horas, que eleva a 639 as mortes vinculadas coa pandemia na Galiza. 

Trátase dunha muller de 83 anos que permanecía ingresada no Hospital Universitario Lucus Augusti (HULA). Fontes dos departamentos de Sanidade e Política Social confirmaron que a muller procedía da residencia do Incio, intervida pola Xunta por un abrocho que afecta a máis dun cento de persoas, e que presentaba patoloxías previas.

Incremento dos gromos

As residencias están a ser, igual que acontecera na primeira vaga da pandemia, un dos focos con maior incidencia na Galiza. De feito, un novo positivo prendeu as alarmas no Fogar Residencial de Vilar de Barrio (Ourense), onde este domingo someterán a probas a 40 persoas e a todo o cadro de persoal após confirmarse que un dos empregados dera positivo en Covid-19

Fontes da área sanitaria de Ourense informaron da activación do protocolo de búsqueda activa de posíbeis asintomáticos no centro residencial para "detectar precozmente posíbeis contaxios" entre esta "poboación vulnerábel".

Catro mortes en 24 horas

Con todo, só nas últimas 24 horas, Sanidade notificou catro falecementos, dous deles vinculados á residencia do Incio. En total, os casos activos na Galiza, a espera de coñecer a actualización, ascendía até 3.294.