Coronavirus: 3.723 persoas contaxiadas e 86 vítimas mortais

A morte nas últimas horas de dous homes de 92 e 85 anos de idade que estaban ingresados no Hospital Universitario de Ourense converte esta segunda feira na xornada con máis vítimas mortais en Galza en relación á pandemia de coronavirus, ao falecer 17 persoas en total, o que eleva o balance global a 86 falecidos.

Desta forma, os falecidos na área sanitaria da Coruña son 32, na de Ferrol 8, en Santiago 11, en Lugo 7, en Ourense 12, en Pontevedra 7 e en Vigo 9.

Este domingo rexistráronse 10 mortes, incluída a dunha embarazada de 37 anos de idade e o seu bebé, no Hospital Teresa Herrera, o centro materno-infantil do Complexo Hospitalario da Coruña (Chuac).

O Ministerio de Sanidade, esta segunda feira, informou que na Galiza hai 3.723 persoas contaxiadas polo coronavirus, das cales 134 están en UCI. Ademais, 168 foron dadas de alta.

Consellaría

A Dirección Xeral de Saúde Pública da Consellería de Sanidade informa que, na última actualización, esta segunda feira, o número de casos de coronavirus en Galiza ascende a 3.476, deles 807 son da área da Coruña, 289 da de Lugo, 479 da de Ourense, 348 da de Pontevedra, 866 da área de Vigo, 529 da de Santiago, e 158 da de Ferrol.

Do total de pacientes positivos, 134 permanecen en UCI, 766 están en unidades de hospitalización e 2.576 no domicilio. Polo de agora, en Galiza rexistráronse 168 altas de pacientes e 79 falecementos. 

O número de PCR realizadas é de 16.118.

Estado

No conxunto do Estado o número de contaxiadas supera as 85.000 e os falecementos son 7.340. Máis de 5.000 pacientes con COVID-19 están en unidades de coidados intensivos. O Estado español xa supera China en número de casos rexistrados de COVID-19.