A Mesa lembra aos estados da UE o apoio da sociedade á oficialidade do galego e ofrécese para clarificar dúbidas

A entidade en defensa da lingua galega recordou ás representacións permanentes dos estados membros da Unión Europea (UE), que o 18 de xullo debaterán de novo a oficialidade do galego nas institucións comunitarias, así como que "a ausencia de recoñecemento da nosa lingua é unha anomalía á que cómpre pór fin".

Neste sentido, a Mesa pola Normalización Lingüística solicitou aos estados que apoien a oficialidade do galego e púxose á súa disposición para aclarar calquera dúbida ou coñecer máis directamente todo o relativo ao idioma da Galiza.

A Mesa pola Normalización Lingüística recuperou a carta aberta que asinaron en novembro de 2023 máis de 30 representantes de entidades públicas e sociais, pedíndolles aos estados da UE que voten "si" ao recoñecemento da lingua galega como oficial da Unión Europea.

Así, salientou que "o galego é garantía de futuro, de existencia digna e próspera como pobo". A carta está asinada polos alcaldes e alcaldesas das principais cidades galegas, polos reitores das tres universidades, polos presidentes das Deputacións de A Coruña e Lugo, polos secretarios xerais dos principais sindicatos con presenza no país e polas principais entidades da cultura, da educación, das empresas e do rural galego.

Nela, salientan que "o idioma é o mellor instrumento común que creamos todas e todos os galegos e unha necesidade para avanzarmos xuntas todas as xeracións actuais na cultura, na educación, no progreso social, económico e político".

Recordan, tamén, que "a oficialidade do galego en Galiza, recoñecida en 1981, non será plena se non atinxe a todos os ámbitos da nosa vida social, económica e cultural, hoxe condicionada en moitos aspectos pola nosa pertenza a unha Unión Europea que aínda non recoñece plenamente a nosa lingua".

"Para afrontar o futuro en todos os ámbitos precisamos o apoio e protección que as regulacións europeas dan ás linguas oficiais da Unión", afirma o documento, que tamén asinan Mónica Fernández Valencia, presidenta da Coordinadora de Traballadores e Traballadoras pola Normalización da Lingua; Celia Armas, directora de Abertos ao Galego; Elsa Quintas Alborés, directora do Observatorio Dereitos Lingüísticos, e Marcos Maceira Eiras, presidente da Mesa pola Normalización Lingüística.

Naquela altura, en setembro de 2023, a vicepresidenta da Mesa pola Normalización Lingüística, Elsa Quintas, participara tamén nunha rolda de prensa no Parlamento Europeo na que a Rede Europea de Igualdade Lingüística (ELEN) pediu aos estados da Unión Europea que voten a favor do recoñecemento pleno da oficialidade do galego, o catalán e o vasco a nivel comunitario.

Quintas manifestara, na súa intervención, que "o impacto sería moi positivo e suporía un paso enorme cara ao recoñecemento e a normalización das linguas minorizadas, porque a oficialidade a nivel europeo é fundamental para protexer os dereitos lingüísticos das persoas falantes destas linguas".

"De feito", abondara, "hai máis de 500 medidas legais de todo tipo que requiren a presenza e o uso das linguas oficiais da UE. Especialmente, no relativo ao consumo. E isto é moi importante, porque ten implicacións directas e indirectas na vida diaria das persoas".