Menos combativa pero firme: Moaña seguirá "vixiante" en defensa da Atención Primaria
"Urxencias xa!"
A raíz da Covid, da mudanza de todos os protocolos sanitarios e das condicións de acceso aos distintos centros asistencias, o Goberno galego fechou as urxencias de Moaña e centralizou o servizo en Cangas.
"Naquel momento entendémolo", afirmou no seu discurso semanar a rexedora Leticia Santos. Mais superados dous anos "isto non pode seguir así. Querémolas de volta".
Desde abril de 2020 os veciños e veciñas do municipio teñen que desprazarse até o PAC de Cangas en caso de urxencia médica calquera día a partir das tres da tarde mais as 24 horas de sábados e domingos.
Necesitamos o PAC aberto en Moaña calquera día as 24 horas, necesitamos as urxencias porque ir a Cangas non é fácil nin é cómodo
"Levamos moito tempo pelexando para que isto non siga así". E por fin chegaron os primeiros compromisos por parte da Xerencia da área sanitaria de Vigo. "Agora o que esperamos son avances nos trámites para que nos devolvan as urxencias", afirmou Santos.
A alcaldesa aproveito a ocasión para demandar transparencia no proceso, e información suficiente para dala a coñecer entre a veciñanza. "Necesitamos o PAC aberto en Moaña calquera día as 24 horas, necesitamos as urxencias -recalcou- porque ir a Cangas non é fácil nin é cómodo".
"Coa nosa saúde non se xoga!"
Por outra parte, Leticia Santos lembrou durante a concentración deste domingo que tamén alcanzaron un compromiso por parte do Sergas para cubrir as vacantes médicas que desde 2021 afectan á quenda de tarde.
De catro facultativos só hai tres. "Avanzaron que ían cubrir esa cuarta que falta e ampliar o cadro a cinco médicos e médicas cunha praza de nova creación. Se iso se consegue será un éxito da veciñanza que domingo tras domingo se reuniu diante da Casa do Mar e servirá para consolidar a Atención primaria na quenda de tarde", que hai poucos meses parecía correr o risco de desaparecer.
A alcaldesa recoñeceu e agradeceu a unidade e solidariedade da localidade, que reclama un reforzo do servizo de ambulancias "polo menos mentres o PAC continúe en Cangas", xa que o equipo médico está máis lonxe e "iso dilata os tempos de atención".
Esa ambulancia extra "non está comprometida, pero non por iso imos deixar de reclamala. É unha necesidade que teñen que atender".