Medallas Pardo Bazán para a Federación de Mulleres Rurais de Ourense e a Rede contra os Malos Tratos de Vigo
A Federación Provincial de Mulleres Rurais de Ourense (Femuro) e a Asociación Rede Mulleres Veciñais contra os Malos Tratos de Vigo foron recoñecidas coas Medallas Emilia Pardo Bazán 2020, un galardón que outorga a Xunta a persoas e entidades que traballan pola igualdade de xénero.
Ademais, recibe o premio a título póstumo a ex presidenta da Casa Galiza Xapón, Megumi Shiozawa, que faleceu o pasado mes de marzo.
A Xunta explica que estas medallas levan o nome da escritora Emilia Pardo Bazán por tratarse dunha "precursora" no ideario sobre dereitos das mulleres e feminismo, ademais de polo "carácter reivindicativo da educación das mulleres".
A Federación de Mulleres Rurais de Ourense (Femuro) naceu en 1998 e conta actualmente con 64 entidades asociadas. Aliás, forma parte do Consello Social de Ourense e do Consello Galego de Benestar.
A Asociación Mulleres Veciñais Contra os Malos Tratos de Vigo atende demandas cotiás de mulleres, especialmente mediante intervención directa con aquelas que sofren violencia de xénero.