Por volta das 14 horas do día de onte, rexistrábase no concello de Carballeda de Valdeorras un novo incendio forestal. En concreto, o fogo iniciouse na parroquia de Casaio e, segundo confirmou a Consellaría de Medio Rural, supera, ao fechamento desta edición, as 90 hectáreas calcinadas.
Este supón o segundo ano consecutivo que Carballeda sofre un incendio, xa que no mes de xuño do ano pasado viviuse un fogo que queimou máis de 10.000 hectáreas e que afectou varios concellos da comarca valdeorresa, como o Barco.
Incendios extinguidos, controlados e estabilizados
A Consellaría do Medio Rural deu por controlado onte ás 13.20 horas o incendio forestal declarado apenas dúas horas antes (sobre as 11.20 horas) no Parque Natural das Fragas do Eume, en concreto, na parroquia de Queixeiro, no municipio de Monfero. Segundo a información facilitada pola Xunta, a superficie afectada por este fogo é menor a unha hectárea.
Así mesmo, deu por extinguido ás 11.04 horas o incendio declarado na parroquia de Saiar, no concello de Caldas de Reis, que tamén afectara a localidade de Vilagarcía de Arousa. Segundo as estimacións provisionais, este fogo calcinou unhas 450 hectáreas.
Por outra parte, permanece estabilizado desde as 12.28 horas da segunda feira o incendio declarado a pasada quinta na parroquia de Cures, no municipio de Boiro, e que afectou tamén os concellos da Pobra do Caramiñal e Ribeira. Este incendio é o de maior superficie calcinada no mes de agosto no país, con 2.200 hectáreas ardidas.
Mentres, o de Verín, continúa controlado desde as 11.51 horas desta segunda feira. Neste incendio, que segundo a Xunta se iniciou en máis de dez focos diferentes, arderon unhas 600 hectáreas.
Finalmente, en Ponte Caldelas, tamén permanece controlado desde as 12.05 horas da segunda o fogo iniciado na parroquia de Xustáns, cunha superficie afectada dunhas 380 hectáreas.
"Ímolos coller"
O conselleiro de Medio Rural, José González, advertiu onte a "todos aqueles que, de modo intencionado, están a provocar incendios na Galiza". Asegurou que "temos maneiras de descubrilos, ímolos coller e caerá sobre eles todo o peso da lei".
