Entra en vigor unha minguada Lei de Benestar "só para mascotas": estas son as medidas aprobadas e as que ficaron fóra
Nin coto ás touradas, nin maior protección para os cans de caza, nin restricións á propia cazaría con finalidade lúdico-deportiva. A nova Lei de Benestar Animal, que onte entrou en vigor en todo o Estado español, supón un notábel progreso en materia de animais domésticos respecto á normativa precedente; non así en moitos outros aspectos nos que se presupuña que debía incidir un texto que se cociñou a lume morno no Congreso durante dous anos. Desde o movemento ecoloxista e as organizacións en defensa dos dereitos dos animais, de feito, recoñecen estes avances mais lamentan que tornase finalmente nunha "lei para mascotas".
Unha das cuestións máis controvertidas foi a relativa á situación aos cans utilizados polos cazadores para a actividade cinexética, que no primeiro borrador non se diferenciaban dos demais pero que se excluíron pola aprobación dunha emenda presentada polo PSOE e apoiada por PP, Vox, PNV e Coalición Canaria e á que se opuxo, entre outras forzas, Unidas Podemos, a impulsora da lei da man do Ministerio de Dereitos Sociais de Ione Belarra. Tamén os cans pastores e gardiáns do gando, os de terapias asistidas e os empregados pola Policía, así como os empregados en actividades deportivas e as aves de cetrería, quedaron fóra da norma.
E outra emenda proposta por CC e amparada polo 'si' de socialistas e populares permitiu que instalacións como parques zoolóxicos e centros de investigación manteñan no seu emprazamento actual os cetáceos até o seu falecemento. E os propios zoolóxicos poderán seguir operando malia que nun primeiro intre se propuxera a súa reconversión en lugares de "cría autóctona en catividade".
A lei tampouco ataca a tauromaquia nin altera o réxime de cans de raza perigosa vixente. E, no que atinxe á exhibición de animais, queda prohibida nos circos e outros emprazamentos... tamén con excepcións, como é o caso das mulas e bois dos 'Beléns viventes' ou a cabra da Lexión, que seguirá ás ordes do Exército e desfilando cada 12 de outubro. E non se obrigará as persoas con mascotas, polo de agora, a rexistralas, faceren un curso formativo, disporen dun seguro de responsabilidade civil, tal e como dispuña a lei, pois todo isto carece do desenvolvemento normativo preciso, algo do que o Ministerio culpa a que "o Goberno está en funcións".
O que si se aplica
Si son de aplicación desde onte mesmo outras medidas como a prohibición de sacrificar animais abandonados, aplicar a eutanasia a un can —agás por "extrema necesidade" e baixo supervisión veterinaria—, comprar mascotas en tendas ou a través da internet, participar en pelexas de cans ou deixalo atado a un farol ou deixalo só sen vixilancia durante máis de 24 horas.
Aliás, poderase acceder con cans, gatos e furóns aos medios de transporte, espazos públicos, estabelecementos públicos e privados, aloxamentos hostaleiros, restaurantes e bares. Igualmente, terán acceso libre a edificios e dependencias públicas e aos albergues, refuxios, centros asistenciais destinados á atención de persoas en risco de exclusión social, persoas sen fogar ou vítimas de violencia de xénero.