Así vai ser a vacinación: 15 grupos de poboación e de xaneiro a xuño
Anunciouno o ministro de Sanidade, Salvador Illa.
O ministro de Sanidade, Salvador Illa, anunciou esta sexta feira nunha rolda de prensa os 15 grupos de poboación que, ao longo de tres fases que previsibelmente principiarán en xaneiro e finalizarán no verán, recibirán a vacina, segundo establécese no Plan de Vacinación contra a Covid-19, aprobado esta terza feira polo Consello de Ministras.
Como xa anunciou esta semana, os primeiros en recibir a vacina serán os residentes e o persoal sanitario de residencias e centros de grandes dependentes.
En total, na primeira etapa da vacinación vacinarase a 2,5 millóns de persoas
Eles e elas serán os primeiros en recibir a vacina unha vez cheguen as primeiras doses, a partir de xaneiro de 2021 e até marzo.
A continuación farao o resto de persoal sanitario e os grandes dependentes non institucionalizados. En total, na primeira etapa da vacinación vacinarase a 2,5 millóns de persoas.
Así mesmo, e aínda que aínda non está decidido en que fase de vacinación entrarán, o resto de grupos son: persoas con condicións de risco, persoas que viven ou traballan en comunidades ou contornas pechadas, persoas vulnerables pola súa situación socioeconómica, persoas con traballos esenciais, persoal docente, poboación infantil, adolescentes, novas e persoas máis afectadas polo xurdimento de brotes, persoas embarazadas e que están en lactación, e as persoas seropositivas de coronavirus.
"Conforme vaiamos recibindo información de dispoñibilidade de vacinas serán asignados os grupos ao longo da fase dúas e tres", dixo Illa, para comentar que a segunda fase levará a cabo desde marzo e ata finais de maio ou principios de xuño, e a terceira ao longo do verán.
Vacinas
Das 51 vacinas experimentais contra a Covid que, a día de hoxe, se encontran en ensaios clínicos en humanos, só 10 entraron na fase 3. As máis avanzadas utilizan unha tecnoloxía innovadora, que consiste en inxectar nas células humanas fragmentos de instrucións xenéticas chamadas ARN mensaxeiro, para que o corpo fabrique proteínas ou "antíxenos" específicos do novo coronavirus. Estas proteínas serán entregadas ao sistema inmunitario, que producirá entón anticorpos.