Greenfiber avalía opcións técnicas para a conexión de Altri e estuda presentar alegacións ao arquivo da Xunta

Greenfiber, a empresa que impulsa o proxecto de Altri na comarca da Ulloa, avanzou que analiza “diferentes opcións técnicas” para a conexión á rede eléctrica, “independentemente da planificación futura de Red Eléctrica Española”, e trasladou que estuda presentar alegacións ao arquivo da iniciativa anunciado este 20 de febreiro pola Xunta. Nun comunicado, a entidade insistiu en que a decisión do Goberno español de excluír a factoría da planificación eléctrica ten “un carácter político e non técnico”, xa que “non se achegou ningunha explicación técnica que xustificase esa exclusión”.

Ademais, lembrou que Greenfiber presentou alegacións a esta planificación e que, até o momento, “non recibiron contestación por parte do Ministerio español”. En todo caso, avanzou que a empresa estuda outras “opcións técnicas” para a conexión á rede eléctrica. En canto ao procedemento administrativo, a multinacional defendeu que actuou desde o primeiro momento “coa máxima dilixencia, achegando toda a documentación técnica que se lle requiriu”.

De feito, subliñou que “aínda está á espera dunha decisión da Consellería de Medio Ambiente sobre a Autorización Ambiental Integrada (AAI)”, algo que, sinalou, “non depende da conexión eléctrica”. Por outra banda, respecto da comunicación da Xunta sobre o inicio do procedemento de arquivo do expediente, Greenfiber explicou que “se reserva o dereito de presentar as alegacións que considere oportunas”.

Por último, a compañía insistiu na “madurez do proxecto”, así como “no valor que pode achegar á economía, ao territorio e ao sector forestal de Galicia”. “Un valor recoñecido pola UE, ao outorgarlle o selo STEP que leva aparellada a consideración de proxecto estratéxico para Europa”, aseverou.