Unha unidade especializada en reconstrución de accidentes de tráfico da Garda Civil, desprazada desde Mérida (Estremadura), traballa na reconstrución desde as 10 horas desta cuarta feira do accidente que o pasado 1 de abril acabou coa vida de catro mozos en Xove (A Mariña). Aquela madrugada, un Citroën C4 con seis mozos no seu interior de entre 17 e 19 anos saíra da estrada no quilómetro 1.100 da LUP-2604, nunha curva pronunciada na Rigueira, nas proximidades da urbanización Palmeiro.
No asfalto non quedaron sinais de freada do vehículo, que se precipitou por un terraplén de entre tres e catro metros, bateu cun poste do tendido eléctrico e, após dar varias voltas de campá, acabou na leira dun veciño. Foi este o que ás 9.40 horas deu aviso aos servizos de emerxencias. Con todo, a Garda Civil estima que o accidente puido producirse horas antes, xa que o seis mozos viñan dunha verbena nunha localidade próxima.
Agora, no marco da investigación, a unidade do Instituto Armado chegada de Mérida realiza medicións que comparará coas tomadas o propio día do accidente. O obxectivo é esclarecer desde a hora exacta á que se produciu o sinistro até a velocidade e o estado da vía, entre outros asuntos. Os traballos de medición e reconstrución continuarán durante todo o día.
Arredor dunha decena de efectivos, tamén galegos, acordoaban a zona minutos antes das 10 horas, cando comezaron os labores de medición non só na área do accidente, senón tamén desde metros antes da curva.
Buscan calcular así a trazada máis parecida posible á que levaba o coche sinistrado e a velocidade coa que entrou na curva. Ademais, levaron a cabo unha reconstrución de freada cun vehículo da Garda Civil.
No accidente faleceron catro persoas das seis que viaxaban nun vehículo con capacidade legal para cinco. Entre os sobreviventes, o condutor, ao que se lle practicaron probas de alcolemia que resultaron positivas e que estivo ingresado na UCI até mediados do pasado mes de maio, e outro mozo, que resultou ileso.
Este último saíu polo seu propio pé e foi atendido horas máis tarde nun centro sanitario, onde recibiu a alta pouco tempo despois. Este mozo ausentouse do lugar do accidente durante varias horas, polo que o Xulgado de Instrución Nº2 de Viveiro —de garda o día do ocorrido e a cargo do caso— investiga se concorre un delito de omisión do deber de socorro, "ao ausentarse do lugar do sinistro sen socorrer aos outros ocupantes do vehículo nin demandar auxilio".
