Xa están na Galiza os tres sobreviventes do Vila de Pitanxo
Pasaban uns minutos da medianoite cando o A-400 do Exército do Aire que traía os tres sobreviventes do 'Vila de Pitanxo' e cinco dos nove falecidos confirmados aterrou no aeródromo de Santiago de Compostela.
Durante as horas previas, xa se habilitara un dispositivo de cinco vehículos fúnebres para trasladar os cadáveres. Xunto a eles agardaban os familiares dos sobreviventes e dos falecidos, o presidente do Goberno español, Pedro Sánchez; o presidente da Xunta, Alberto Núñez Feixoo; o ministro de Pesca, Luis Plana; e a conselleira do Mar, Rosa Quintana, entre outros representantes políticos.
Pouco antes da chegada da aeronave, Sánchez mantivo un encontro con familiares dos mariñeiros, que xa se reuniran previamente con Feixoo, e no que lle trasladaron ao presidente do Executivo español as súas peticións.
Agora que os mariñeiros que puideron ser recollidos do mar están xa na Galiza, os achegados dos doce desaparecidos no mar de Terranova exixen ao Goberno español que poña enriba da mesa os medios necesarios para intentar atopalos.
Peticións dos familiares
Durante o encontro entre Pedro Sánchez e os familiares dos mariñeiros que aínda seguen desaparecidos, estes exixíronlle que o Estado español envíe á zona do naufraxio un robot sumerxíbel até máis de 3.000 metros de profundidade, así como fragatas F-100 e outros medios.
Asemade, instan a que se estabeleza un diálogo coa Organización de Pesquerías do Atlántico Norte (NAFO) para "activar" todos os barcos que faenan nesta zona e para pór unha alarma de avistamento.
Tamén lle pediron que o Goberno español manteña contacto do canadense para que este poña en funcionamento quendas de recoñecemento marítimo con aeronaves do servizo de salvamento do país norteamericano.
Por último, os familiares instaron o presidente do Executivo estatal a que tramite unha reunión entre eles e o director xeral da Mariña Mercante, xa que "é o responsábel de Salvamento Marítimo e coordina o relativo co naufraxio de España con Canadá".