As administracións galegas destinan unha media anual de 398,3 euros por habitante en servizos sociais, case 50 euros menos que a media do Estado.
Así se constata no Índice de Desenvolvemento dos Servizos Sociais, o Índice DEC 2021, presentado esta cuarta feira, que describe a situación dos servizos sociais após o impacto da pandemia.
Gasto en relación ao PIB
O informe apunta a un avance no desembolso (31,3 euros máis por habitante) despois de anos de estancamento que, con todo, non fai que a Galiza supere a media do Estado, que foi de 446,9 euros. En relación ao Produto Interior Bruto (PIB), a Galiza Ggasta 1,82% e aproxímase á media estatal, situada en 1,88%.
O documento apunta que o país presenta un desequilibrio entre o que se considera como 'dereitos de papel', é dicir, a definición do sistema a nivel administrativo e legal; e o seu peso económico, ao contar cunha relevancia "débil" e cunha cobertura de prestacións e servizos "reducida".
Rendas de inserción
A Galiza tamén está por baixo da media en rendas mínimas de inserción, xa que só alcanzan 4,6% das persoas que se encontran por baixo do limiar da pobreza, cinco puntos menos que a media do Estado.
O país tamén ten menos prazas residenciais para idosos (1,92% de cobertura por 2,7% estatal) e presenta unha cuarta parte da media en canto ao servizo de teleasistencia, con 2,7% por 10% de todo o Estado.
