A Galiza acolle 6 marchas contra "o espolio eólico"

A s montañas son "xoias naturais que debemos atesourar". Así o afirma a Organización das Nacións Unidas (ONU) na súa declaración polo Día Internacional das Montañas, unha efeméride que decorre a vindeira segunda feira, 11 de decembro. Unha declaración na que sinalan estes ecosistemas como hospedadores de aproximadamente a medade da reserva da diversidade biolóxica do planeta e subministradores de auga doce para máis de 50% da poboación humana. Son, ademais, as nacentes do 80% dos ríos e regatos que abastecen de auga a Galiza. Non obstante, segundo indica o organismo internacional, as montañas encóntranse fortemente ameazadas polo cambio climático, a sobreexplotación e a contaminación, uns agravios aos que se suma na Galiza, denuncia o movemento ecoloxista, a instalación indiscriminada de polígonos eólicos. Precisamente por este motivo, e aproveitando a celebración do Día das Montañas, a Coordinadora Eólica Así Non –conformada por máis de 200 plataformas e colectivos galegos– convoca mobilizacións esta fin de semana en seis localidades en defensa das montañas "fronte a Gobernos" e empresas "especuladoras". As empresas eólicas obtiveron ingresos de 6.826 millóns de euros na última década na Galiza "Que os nosos gobernantes vexan que non imos calar, que imos seguir loitando, e que non é cuestión de ver quen se aburre antes. Nós non imos cansar de reclamar o que é noso e que os montes fan unha función importantísima independentemente do beneficio que poida traer a eólica", afirma a Nós Diario Patricia Gamallo, integrante do movemento veciñal Amil Sen Eólicos, que agrupa persoas de Moraña, Xeve e Campo Lameiro en defensa do monte Acibal. "Non queremos montes dinamitados para pór muíños enriba", engade Gamallo. Moraña (comarca de Caldas), onde a mobilización veciñal conseguiu que o Tribunal Superior de Xustiza da Galiza (TSXG) paralizara o polígono eólico que a empresa Norvento comezara a construír no monte Acibal, acollerá este domingo unha das concentracións, marchas e andainas convocadas por Eólica Así Non, xunto á Fonsagrada, Lugo, Ortigueira (Ortegal), Val do Dubra (comarca de Compostela) e Vilar de Barrio (A Limia) para enxalzar o "determinante" papel que está a xogar a sociedade civil organizada na defensa do territorio galego "fronte o espolio eólico e a traizón dos Gobernos" galego e español. Eólica Así Non apela as Administracións públicas a defender os valores e recursos naturais comúns dos montes galegos, fronte a depredación eólica, dado o "manifesto abandono da súa función pública como valedores do interese xeral no proceso de transición ecolóxica que tanto a Xunta da Galiza como o Goberno español veñen demostrando". "Pomos o foco no Goberno da Xunta porque é o que ten a capacidade de paralizar as obras e a facultade de decidir se unha declaración de impacto ambiental é favorábel ou non", explica a integrante de Amil Sen Eólicos. Mobilizacións na Galiza no Día Mundial das Montañas fronte á “especulación eólica” Restaurar as montañas Este ano o tema para o Día Internacional das Montañas escollido pola ONU é a 'Restauración dos ecosistemas de montaña' buscando demandar solucións, mellores prácticas e investimentos baseados na natureza que constrúan resiliencia. No caso do Acibal, o lema chega tarde: "Non é posíbel unha restauración completa desde o momento en que dinamitaron o monte", lamenta Gamallo, nunha comarca na que tamén planifican os polígonos eólicos Anduriña e Zudreiro. Porén, noutros puntos da Galiza as obras para a instalación dos parques eólicos que teñen luz verde da Xunta aínda non comezaron, mais practicamente cada semana emítense declaracións de impacto ambiental (DIA) positivas para proxectos eólicos no país. Nesta situación atópase o concello de Vilar de Barrio, que acollerá mañá unha das seis mobilizacións. "Ameázanos por todos os costados pero de momento imos librando", afirma o alcalde, Manuel Conde, en declaracións a Nós Diario. Primeiro foi a empresa Statkraft co fracasado macroproxecto de Rebordechao, ao pé da Serra de San Mamede e entre os concellos de Vilar de Barrio (A Limia), Maceda (comarca de Allariz-Maceda) e Laza (comarca de Verín). Logo, o polígono Fial das Corzas, entre Vilar de Barrio e Laza, un proxecto que conta con autorización administrativa previa outorgada polo Executivo galego. E outro entre Xinzo, Sarreaus e Vilar de Barrio (os tres na Limia), que "en principio non conseguiu o permiso da Xunta, polo que decaería", explica. "Ningunha destas industrias ou actividades económicas pensa no noso desenvolvemento", engade Conde, que define a comarca da Limia como "o interior do interior da Galiza". Nun rural "en franca decadencia", os colectivos afectados reclaman unha transición enerxética que repercuta positivamente no territorio. "Temos proposto a posibilidade de pór outro tipo de instalacións, como placas solares, ou de constituír comunidades enerxéticas, coa idea de que a produción quede aquí, no propio territorio. Pero non para facer estradas, porque pouco lle vale á veciñanza ter as estradas asfaltadas ou ter un montón de luminarias se non hai xente", relata o rexedor nacionalista Manuel Conde. "A instalación de eólicos e a transición enerxética non pode ser a custa do rural, asoballándoo, e destruíndo os montes", sostén Patricia Gamallo "Hai moitas maneiras de facer unha transición enerxética e esta ten que ser xusta", afirma na mesma liña Patricia Gamallo a Nós Diario. "A instalación de eólicos e a transición enerxética non pode ser a custa do rural, asoballándoo, e destruíndo os montes". Rueda carga contra a paralización de eólicos por parte da Xustiza: "Non comparto os criterios do TSXG" Apelar os Gobernos como responsábeis En 2021, o Concello de Vilar de Barrio foi a primeira institución en rexeitar publicamente un parque eólico, o de Rebordechao, que non traía "beneficios para a veciñanza". Nesta liña, a convocatoria de Eólica Así Non apela os Gobernos como responsábeis da defensa do medio natural e, neste caso, das montañas. "Queremos facer unha demostración de forza ante os nosos gobernantes, tanto do Goberno español como do galego e dos municipais, que son as Administracións máis próximas", afirma a Nós Diario Patricia Gamallo, integrante de Amil Sen Eólicos. O CES reclama á Xunta da Galiza a posta en marcha dunha empresa pública de enerxía Luz verde ao parque eólico de Borrasca Só un día despois de coñecerse o visto e prace que o Ministerio para a Transición Ecolóxica deu aos parques eólicos de Greenalia Boura, Monzón e Ventisca, que situarán 32 novos aeroxeradores nas comarcas da Mariña, A Terra Chá e Meira, o BOE recolleu onte a declaración positiva de impacto ambiental dun cuarto proxecto a engadir ás liñas de evacuación de enerxía dos outros tres, Borrasca. Este parque afectaría os termos municipais de Cervo, Foz, Lourenzá, Mondoñedo e Xove, todos na Mariña. O Ministerio obriga a recolocar varios muíños que, aliás, se situarán a menos de 600 metros de varios núcleos poboacionais. O Estado concede o permiso ambiental a un novo parque eólico de Greenalia, mais obriga a recolocar varios muíños