Profesorado féchase en centros da Coruña, Monforte, Pontevedra e Vigo para exixir "melloras" no ensino público
O profesorado galego en loita contra as políticas da Consellaría de Educación iniciou esta terza feira unha nova fase de protestas, seguindo a estela das folgas e mobilizacións do primeiro trimestre escolar: feches rotatorios en centros de ensino dunha quincena de localidades galegas. Unha acción, convocada pola CIG e STEG, coa que "denunciar e visibilizar" en cada comarca "as necesidades máis urxentes en materia de atención á diversidade, redución de ratios, recuperación do horario lectivo, impartición de [materias] afíns, falta de desdobres, resultados nefastos da reforma da FP", apuntan desde os dous sindicatos.
O CEIP Concepción Arenal (A Coruña), o IES Politécnico (Vigo), o IES Frei Martín Sarmiento (Pontevedra) e o IES Francisco Daviña (Monforte) foron os primeiros centros en acoller esta terza estes fechamentos, que comezaron pola tarde e nalgúns casos estendéronse durante toda a noite. "Queremos que os feches sirvan para analizar as demandas conxuntas de toda a comunidade educativa", afirma a Nós Diario Laura Arroxo, secretaria nacional da CIG-Ensino, o sindicato maioritario no ensino público.
Os encerros comezaron a partir da media tarde de esta terza para "facilitar así a participación de familias e alumnado" e neles realizáronse asembleas abertas, elaborouse material reivindicativo para colgar nos centros ou debateuse sobre futuras accións a levar a cabo. "Os feches non son só para acompañar os docentes, trátase de escoitar e debater coa comunidade escolar sobre a situación actual do ensino público", apunta Arroxo. A secretaria nacional da CIG-Ensino critica que a resposta a meses de mobilizacións do profesorado sexa a "propaganda" ou o "menosprezo". Pon como exemplo da actitude do departamento que dirixe Román Rodríguez que "a piques de rematar xaneiro non saibamos nin de que especializades van convocar oposicións en breve malia que o propio presidente da Xunta da Galiza anunciou xa hai semanas que se ían convocar".
Pola súa parte, a secretaria de organización do STEG, Comba Campoi, indica a Nós Diario que estes feches responden a que "nos centros de ensino levamos moito tempo con malestar, cun profesorado saturado, con cada vez menos tempo para facer ben o seu traballo por ter que atender a burocracia e outras responsabilidades", ao que engade as consecuencias cada vez "máis graves" dos recortes no ensino.
"Martes en loita"
Outra acción reivindicativa que van impulsar estes sindicatos é fixar un día á semana para evidenciar todas as carencias que existen en materia de deficiencias de persoal. Para iso, e xogando co lema deste conflito, "profesorado en loita", e coa cor negra, CIG e STEG propoñen que sexan as terzas feiras os días nos que o profesorado acuda vestido de negro e "empapele os centros con mensaxes nas que queden de manifesto as necesidades educativas do centro, que lle serán transmitidas ao alumnado e ao profesorado".
