Familias de Lalín denuncian a retirada de coidadores en centros educativos e exixen á Xunta a súa restitución

Familias do CEIP Vicente Arias da Maza de Lalín (O Deza) denunciaron que o alumnado con necesidades especiais non dispón nestes momentos do coidador, ao que teñen dereito, ao ser este retirado desde a volta das vacacións de Entroido. Unha situación, segundo informaron, que tamén afecta ao CEIP Varela Buxán de Cercio.

Nestes momentos, ambos os centros están partillando unha coidadora, que tan só atende ás crianzas a media xornada. As familias puxeron en coñecemento á Inspección educativa da situación, a cal lles deu a razón e instou á Consellaría de Educación a crear a praza.

“As familias estamos vendo como nenos e nenas que precisan apoio quedan sen a atención necesaria no día a día escolar, o que repercute tanto no seu desenvolvemento como no funcionamento xeral das aulas”, sinalan.

O colectivo considera que a retirada destes recursos supón “un retroceso en materia de igualdade de oportunidades” e “incumpre o principio de inclusión educativa recollido na normativa vixente”.

Nesta liña, denunciaron que o departamento educativo da Xunta da Galiza “está dilatando a decisión de restituír as coidadoras”, segundo alertaron, denunciando que a Consellaría “segue sen dar resposta” ás súas reivindicacións.

Neste senso, as familias ven con “preocupación” como se achega o final de curso, temendo principiar o vindeiro ano con esta problemática que afecta “non só aos nenos e nenas con necesidades especiais, senón ao resto do alumnado do centro e pode derivar nun accidente ou situación de perigo”.

Ante estas situación, as familias decidiron principiar unha campaña de recollida de sinaturas para exixir á Xunta da Galiza e á Consellaría de Educación a restitución “inmediata” do persoal de atención educativa nos centros afectados en Lalín e a revisión dos criterios de asignación destes profesionais en toda Galiza. Neste senso, avanzaron que non descartan levar a cabo novas accións se non se atende a súa demanda.