Mentres en varias comarcas do interior e mesmo no Parlamento debaten a necesidade de tomar medidas drásticas como o confinamento de Ourense e Barbadás, os equipos sanitarios da Galiza loitan nos hospitais cun virus que semella moi real. Malia que a inmensa maioría dos falecementos foron de persoas con patoloxías previas que as facían máis febles contra a Covid-19, o goteo de mortes é unha constante.
Hoxe a Consellaría de Sanidade deu o seu parte habitual da situación epidemiolóxica na última xornada no país e agora, a última hora da tarde, informa dos pasamentos que tiveron lugar ao longo do día.
En concreto, hoxe repetíronse as catro vítimas, igual que esta terza feira. Na segunda comunicouse o deceso de oito persoas, a cifra máis alta desde facía meses.
Segundo as autoridades sanitarias, as vítimas desta cuarta feira foron unha muller de 66 anos que estaba ingresada no Complexo Hospitalario de Pontevedra e outra de 90 anos que ficaba no hospital de Vigo.
Así mesmo, perderon a vida unha muller de 91 anos e un home de 81. Os dous eran atendidos polo cadro de persoal do Hospital de Verín. Todos os pasamentos estiveron relacionados coas enfermidades previas.
Con este novo número, o total de vítimas mortais desta pandemia no país é de 773. Tendo en conta que o primeiro deceso do que se falou tivo lugar o 14 de marzo e pensando que xa outubro xa estivese pola metade, a media situaríase en 110 persoas finadas cada mes.
Porén, na chamada nova normalidade xa houbo 152 contaxios coas peores consecuencias. A primeira falecida desta época foi unha muller o 7 de agosto. Antes Galiza pasara dous meses sen falecementos polo coronavirus. É dicir, atendendo a ese dato, os pasamentos tiveron que repartirse en cinco meses cunha media de 154 persoas.
